Футбол бўйича Ўзбекистон олимпия терма жамоаси бош мураббийи Тимур Кападзе Францияда бўлиб ўтаётган 2024 йилги Олимпиада ўйинлари гуруҳ босқичининг 2-турида Мисрдан учралган мағлубият ҳақида фикр билдирди. 27 июль куни ўйин 0:1 ҳисобида якунлангани боис Ўзбекистон терма жамоаси мусобақанинг чорак финалига чиқиш учун барча имкониятларини бой берди.
«Бунақа эрта кетиш ниятимиз йўқ эди. Албатта, биринчи учрашув ҳам, бугун ҳам, менимча, қаердадир омадсизлик, қаердадир тажриба [етишмади]. Келдик, ҳавони кўрдик, ўйнасак бўларди. Энг аламлиси, биз бундан ҳам яхшироқ ўйнасак бўларди ва иккала ўйинда ҳам ғалаба қозонсак бўларди. Алам қиладигани, кучимиз етарди ва етди ҳам, менимча. Қаердадир эпизодларда хато қилдик, гол ўтказдик», — деди мураббий.
«Кейинги сафар келганимизда бундан ҳам кучли бўламиз, бу аниқ. Ҳаммага, мухлисларимизга, биринчидан, раҳмат ва узр сўрайман. Менимча, ўтган ўйиндан ҳам, бугун ҳам мухлисларимиз энг зўри бўлди, уларга катта раҳмат айтаман. Соғ-саломат бўлишсин. Биз ютуқларимиз билан уларни яна хурсанд қиламиз, албатта», — деди Тимур Кападзе.
Эслатиб ўтамиз, 30 июль куни соат 18:00 да Ўзбекистон Доминикан Республикаси билан ўйнайди, аммо бу ўйин фақат учинчи ўрин тақдирини ҳал қилади (гуруҳдан биринчи ва иккинчи ўринларни эгаллаган жамоалар чиқади).
