Шавкат Мирзиёев Париждаги Олимпия ўйинларида 52 килограммгача бўлган вазн тоифасида олтин медални қўлга киритган дзюдочи Диёра Келдиёрова билан телефон орқали мулоқот қилди.
«Давлатимиз раҳбари Ўзбекистон тарихида ёзги Олимпия ўйинларида аёллар ўртасида биринчи марта чемпион бўлган спортчи қизимизни тарихий ғалаба билан қизғин табриклаб, ота-онаси ва мураббийларига миннатдорлик билдирди», — дейилади президент матбуот хизмати хабарида.
«Диёра қизим, чин қалбимдан, халқимиз номидан [табриклайман]. Мана шундай жасоратли, матонатли, фидойи қизим борлигидан ғурурланаман. Камдан-кам бўладиган ғалаба бўлди, дунё қойил қолди, Ўзбекистон обрўсини жуда кўтардингиз, раҳмат қизим. Бугунги ғалабангиз ўзбек аёли, менинг севимли қизларим нималарга қодир эканини яна бир марта дунёга намойиш этганингиз учун жуда миннатдорман. Бугун, албатта, уй билан гаплашганда номимдан ота-онага катта раҳмат, деб қўясиз, қизим. Янги Ўзбекистонимизга олтин ҳарфлар билан тарихда қолдингиз. Мен ғурурландим. Мана шундай давом эттириш керак», — деди Шавкат Мирзиёев.
«Бу ҳали ҳаётингизда катта-катта ғалабаларнинг, шоҳсупаларнинг бошланиши бўлиши керак. Тарихимиздаги буюк боболаримизга, оналаримизга муносиб бўлиб, жаҳонда номингизни қолдиришда қўлимиздан келганча ёрдам берамиз. Лекин меҳнат, жасорат ўзингиздан, қизим. Мана шундай Олимпиада чемпиони бўлиш бу — янги Ўзбекистон тарихида биринчи марта тарихий воқеа. Шунинг учун, жуда катта ғурур билан, ифтихор билан мана шундай қизим борлигидан фахрланаман. Соғ-омон Ўзбекистонда кўришгунча», — дея таъкидлади президент.
Келдиёрова матбуот анжуманида ушбу турнирга узоқ вақт тайёргарлик кўрганини айтди.
«Ҳар битта рақибим энг кучли бўлишини билгандим. Кучлини ютмагунча кучли бўлолмаслигимни жуда ҳам тушуниб тургандим ва ўйлайманки, мана шу сўз менга катта ёрдам берди. Албатта, ортимда бутун Ўзбекистон халқи, бутун Ўзбекистон аёл дзюдочилари турганини ҳис қилдим. Муҳтарам президентимизга Ўзбекистонда аёл спортчиларга қаратилаётган жаҳон даражасидаги эътибор учун чексиз миннатдорчилигимни билдираман», — деди у.
«Олтин» сари йўлда Диёра Келдиёрова амалдаги Олимпия чемпиони, беш йилдан буён мағлубиятга учрамаган япониялик Ута Абэ, германиялик дзюдочи Маша Балхаус, 2020 йилги Олимпия ўйинлари кумуш медали совриндори франциялик Амандин Бюшард ва 48 кг гача вазн тоифасида 2020 йилги Олимпиада чемпиони косоволик Дистриа Красника каби рақиблари устидан ғалаба қозонди.
Бу Ўзбекистоннинг 2024 йилги ўйинлардаги илк медалидир. Диёра Келдиёрова Ўзбекистон тарихида дзюдо бўйича олтин медални қўлга киритган биринчи спортчи ҳисобланади. Бунгача дзюдочилар иккита кумуш (1996 йилда Армен Багдасаров ва 2008 йилда Абдулла Тангриев), шунингдек, 5 та бронза (2008, 2012 ва 2016 йилларда Ришод Собиров, 2016 йилда Диёрбек Ўрозбоев ва 2020 йилда Давлат Бобонов)га эга бўлишган.
Шунингдек, у ёзги Олимпия ўйинларида аёллар ўртасида Ўзбекистонда олтин медални қўлга киритган биринчи спортчи ҳам бўлди. Бунгача ягона «олтин» ни 1994 йилда қишки Олимпиада ўйинларида эркин чанғичи Лина Черязова қўлга киритганди.
