АҚШ Давлат департаменти АҚШга ноқонуний миграцияга кўмаклашувчи ва ундан фойда олувчи шахсларга нисбатан виза чекловлари жорий этилишини эълон қилди.
Энди АҚШга киришга уринаётган ноқонуний муҳожирларга хизмат кўрсатувчи сайёҳлик агентликлари ва туроператорлар раҳбарларига ҳам виза чекловлари татбиқ этилади.
«Биз Ғарбий яримшарда ва ундан ташқарида эксплуатация қилиш амалиётига барҳам бериш бўйича янада кенгроқ кампаниямиз доирасида, ҳукумат ва хусусий сектордаги шериклар билан ҳамкорликда транспорт компанияларининг инсофсиз раҳбарларига қарши виза чекловларидан фойдаланишда давом этамиз. Ҳеч ким — контрабандачилар ҳам, хусусий компаниялар ҳам, давлат амалдорлари ҳам, бошқа ҳар ким ҳам заиф мигрантлардан фойда кўрмаслиги керак,» — дейилади Давлат департаменти баёнотида.
Июнь ойида АҚШ президенти Жо Байден АҚШнинг Мексика билан чегарасини ноқонуний равишда кесиб ўтган муҳожирларга бошпана беришни тақиқловчи фармонни имзолади. Оқ уйнинг ҳисоблашича, бу чоралар АҚШда бўлиш учун қонуний асосга эга бўлмаганларни чиқариб юборишни осонлаштиради.
