Фаластин қаршилик ҳаракати сиёсий бюроси (ҲАМАС) раҳбари Исмоил Ҳания 31 июль, чоршанба куни Теҳронда ўлдирилди. Бу ҳақда Эроннинг Mehr агентлиги Ислом инқилоби қўриқчилари корпусига таяниб хабар қилди.
Ислом инқилоби қўриқчилари корпуси томонидан эълон қилинган баёнотга кўра, Исмоил Ҳания ва унинг қўриқчиларидан бири Теҳрондаги қароргоҳи нишонга олингандан кейин «шаҳид бўлган».
«Қаҳрамон Фаластин, Ислом халқи ҳамда Қаршилик фронти жангчилари ва Эроннинг олижаноб халқига ҳамдардлик билан шуни маълум қиламизки, бугун эрталаб (чоршанба куни) Теҳрондаги ҲАМАС сиёсий идораси раҳбари жаноб Исмоил Ҳания қароргоҳига ҳужум қилинди ва ушбу воқеадан сўнг у ҳамда унинг тансоқчиларидан бири қурбон бўлди», — дейилади баёнотда.
Ҳолат юзасидан қўшимча тергов ҳаракатлари бошланган.
Исмоил Ҳания Эроннинг янги президенти Масъуд Пезешкиённинг инаугурация маросимида қатнашиш учун Теҳронга келганди.
