Шимолий Корея етакчиси Ким Чен Иннинг қизи Ким Жу Эйни отасининг вориси сифатида тайёрлаш бошланди, деб хабар бермоқда Bloomberg ва Yonhap агентликлари Жанубий Корея Миллий разведка хизмати (НРС) маълумотларига таяниб.
29 июль куни НРС ёпиқ йиғилишда парламентнинг разведка қўмитасига Шимолий Кореядаги вазият бўйича ҳисобот тақдим этди. Шундан сўнг икки депутат матбуот анжумани ўтказди ва унинг мазмуни ҳақида журналистларга қисман маълумот берди.
Разведка хизмати Ким Жу Эйнинг омма олдида чиқишлари частотаси ва унга мурожаат қилиш усуллари таҳлили асосида отасининг ўрнига номзод, деган хулосага келди.
НРС маълумотларига кўра, Ким Жу Эй жамоат фаолиятининг тахминан 60 фоизида отасига ҳарбий ва иқтисодий тадбирларда ҳамроҳ бўлган.
Разведка таҳлилчилари унга мурожаат қилинаётганда «йўлбошчи» деган маънони англатувчи «хяндо» сўзи қўлланганини ҳам таъкидлади, аммо бу Шимолий Кореяда «инқилобий курашда олдинга йўлни ёритувчи» деган маънони англатади ва раҳбарлар ёки уларнинг ворисларига мурожаат қилиш учун ишлатилади.
«Улар [Шимолий Корея расмийлари] ташвиқот даражаси ва унинг пайдо бўлиш частотасини жамоатчиликнинг бунга муносабатини ҳисобга олган ҳолда ўзгартирмоқда», — деди ҳукмрон Халқ кучи партияси депутати Ли Сон Квон матбуотга.
Ким Жу Эй оммага биринчи бор 2022 йилнинг ноябрь ойида отаси билан янги қитъалараро баллистик «Хвасон-17» ракетасини синовдан ўтказаётганда оқ қишки пальто кийган ҳолатда кўриниш берганди. Ўшандан бери у Ким Чен Ин билан барча муҳим тадбирларда доимий иштирок этиб келади.
Жанубий Корея разведкаси Ким Жу Эй тахминан 11 ёшда ва Ким ва унинг рафиқаси Ли Соль Жунинг уч фарзандидан иккинчиси деб ҳисоблайди. 2023 йил февраль ойида Ким Жу Эй ота-онаси билан Корея халқ армиясининг 75 йиллигига бағишланган тантанали зиёфатда иштирок этган ва КХДР ҳарбийларининг энг нуфузли вакиллари билан суратга тушганди.
Bloomberg`нинг таъкидлашича, Шимолий Корея етакчисининг бошқа ҳеч бир фарзанди бунчалик эрта ёшда кўрсатилмаган ва Ким Жу Эйнинг пайдо бўлиши Шимолий Корея етакчиларининг фарзандларини улар давлат аппаратининг бир қисми бўлгунига қадар жамоатчилик эътиборидан четда тутиш анъанасини бузган.
Бироқ НРС ворис бўйича якуний қарор ҳали қабул қилинмагани ва Ким Чен Ин бошқа фарзандини ҳам ворисликка танлаши мумкинлигини истисно қилмади.
Шимолий Корея етакчиси ҳозир 40 ёшда ва ўнлаб йиллар давомида ҳокимият тепасида бўлиши мумкин, бироқ НРС Кимда чекиш ва спиртли ичимликлар истеъмол қилиш туфайли ортиқча вазн ва юрак хасталиги хавфи юқори эканини таъкидламоқда. Унинг вазни 140 кг га баҳоланмоқда. Жанубий Корея разведкаси Ким 30 ёшида гипертония ва қандли диабет аломатларини кўрсата бошлаганини тахмин қилмоқда.
- КХДР 1948 йилда ташкил топган. Ўшандан бери мамлакатни эркаклар — Кимларнинг уч авлоди бошқариб келмоқда. Би-би-си рус хизматининг ёзишича, катта эҳтимол, Ким Чен Ин ўз қизини шундай эрта ёшда оммага тақдим этиш орқали у мамлакатни бошқаргунча ҳамма унга кўникиб қолишини кутмоқда.
