1 август — Париж Олимпиадасининг 6-кунида Ўзбекистон терма жамоаси яна 3 та спорт тури: академик эшкак эшиш, дзюдо ва боксда ўз бахсларини давом эттиради.
Соат 12:30 да академик эшкак эшувчи Анна Пракатень медаллар учун курашни A, B ярим финалда давом эттиради. Аввалроқ ўтказилган саралаш баҳсларида у ўз гуруҳида маррага иккинчи бўлиб етиб келганди. Натижа — 7:35.91 сония.
Соат 13:00 дан кейин томошабинларни дзюдочилар Музаффарбек Тўрабоев (-100 кг) ва Ирисхон Қурбонбоеванинг (-78 кг) баҳслари кутмоқда.
Музаффарбек Тўрабоев ўз юришини нимчорак финалдан бошлайди. Ирисхон Қурбонбоева эса нимчорак финал босқичида япониялик Рика Такаяма билан тўқнаш келади.
Соат 14:00 дан бошлаб ўзбекистонлик яна 4 нафар боксчи рингга кўтарилишни бошлайди:
- -50 кг: Сабина Бобоқулова — Чутҳамат Раксат (Таиланд). 1/16 финал, соат 14:16.
- 63,5 кг: Руслан Абдуллаев — Вятт Санфорд (Канада). Чорак финал, соат 15:50. Руслан нимчорак финалда мексикалик Мигель Рамиресни 5:0 ҳисобида мағлуб этганди.
- 66 кг: Навбаҳор Ҳамидова — Морелле Маккане (АҚШ). 1/16 финал, соат 19:50.
- 92 кг: Лазизбек Мулложонов — Кено Марлей Макадо (Бразилия). Чорак финал, соат 00:52. Лазизбек бунгача италиялик рақиби Аддос Моуҳидинни мағлуб этган.
