4 август куни Лос-Анжелес (АҚШ)да катта профессионал бокс оқшомида биринчи ўрта вазн тоифасида WBA камари учун ўзбекистонлик боксчи Исроил Мадримов америкалик боксчи Теренс Кроуфордга қарши рингга кўтарилди.
Жангда WBA камари ҳамда биринчи ўрта вазнда эгасиз бўлиб турган WBO камари ўртага қўйилганди. Ўзбекистонлик жангчи рингда анча рақобатбардош кўринди, аммо раундлар якунида ҳакамлар очколар эвазига Теренс Кроуфорднинг ғалабасини эълон қилди — 116−112, 115−113 ва 115−113.
Бу Мадримовнинг профессионал рингдаги илк мағлубияти бўлди ва у чемпионлик камарини ҳимоя қила олмади. 29 ёшли Исроил Мадримов 2018 йилда профессионал дебютини ўтказган ва март ойида россиялик Магомед Қурбоновни 5-раундда муддатидан олдин мағлубиятга учратиб, вакант чемпионликни қўлга киритган эди.
Кроуфорд мутлақ жаҳон чемпиони, WBC ва WBA камарлари эгаси бўлиб, бунга қадар профессионал боксда жами 40 та жангининг барчасида ғалабага эришган. Ғалабаларининг 31 тасини нокаут билан якунлаган.
Мадримов эса WBA камари соҳиби саналиб, профессионал боксдаги 10 та жангидан 9 тасида ғалабага эришган, фақат битта жангда дуранг қайд этган. 7 та жангни нокаут билан якунлаган.
