Буюк Британиядаги мигрантларга қарши намойишлар бутун мамлакат бўйлаб тарқалиб, тартибсизликларга айланиб кетгани фонида 150 дан ортиқ киши ҳибсга олинди, деб хабар бермоқда BBC.
Ҳафта давомида Лондон, Бристол, Бельфаст, Ливерпуль, Манчестер, Сток-он-Трент, Ноттингем, Ҳартлпуль ва бошқа шаҳарларда тартибсизликлар юз берди.
Ливерпулда намойишчилар полицияга ғишт, шиша ва сигнал ракеталари улоқтирди. Ротерҳемда намойишчилар бошпанасизлар жойлашган меҳмонхонага бостириб кириб, деразаларни синдирди. Тўқнашувда 12 нафар полициячи жароҳат олди.
Бирмингем яқинидаги Тамуэрт шаҳрида ҳам бошпанасизлар учун турар жой сифатида фойдаланилган меҳмонхонага ҳужум уюштирилди, деб ёзди The Guardian.
Британиядаги тартибсизликлар 29 июль куни Саутпортдаги болалар рақс студиясига уюштирилган ҳужумдан сўнг бошланди, унда олти, етти ва тўққиз ёшли уч нафар қиз ҳалок бўлди. Улардан ташқари, яна саккиз нафар бола ва икки киши жиддий даражада пичоқланди.
Ҳужумда 17 ёшли Аксель Рудакубана айбланди, у ўтган ҳафта Ливерпуль Қироллик судига олиб келинди. Ўсмир Уэльс пойтахти Кардиффда туғилган, аммо оиласи руандалик. Унинг мотивлари ҳозирча номаълум.
The Guardian`нинг қайд этишича, ҳужумдан сўнг ижтимоий тармоқларда айбланувчи Буюк Британияга қайиқда келган бошпанасиз экани ҳақида ёлғон хабарлар тарқалган. Ушбу хабарлар фонида ўта ўнглар қироллик шаҳарларида норозилик намойишлари учун тўплана бошлаган.
Буюк Британия бош вазири Кир Стармер мамлакатдаги тартибсизликларни «ўта ўнг бандитизм» деб атади.
«Кафолат бераманки, сиз бу тартибликда иштирок этганингиздан пушаймон бўласиз — тўғридан-тўғри қатнашган ёки интернетда ушбу тўполоннинг қўзғатувчиси бўлган бўлсангиз ҳам… Бу намойиш эмас, бу уюшган, зўравон босқинчилик», — деди у халққа мурожаатида.
Стармернинг айтишича, тартибсизликлар пайтида масжидлар ва полицияга ҳужум қилинган, кўчаларда «нацистча саломлашиш» ва «расистча риторика»лар кузатилган.
«Бундай ҳаракатларни ҳеч қанақасига оқлаб бўлмайди — ҳеч қанақасига. Барча эс-ҳуши жойида одамлар бундай зўравонликни қоралаши керак. Бу мамлакатдаги одамлар хавфсизлик ҳуқуқига эга», — деди Британия ҳукумати раҳбари.
