Урганч халқаро аэропорти 5 август куни учиш-қўниш йўлаги капитал таъмиридан сўнг очилди. Шу куни кечқурун у биринчи самолётни қабул қилди.
Соат 11:00 да самолётларнинг учиб келиши ва учиб кетишига қўйилган барча чекловлар бекор қилинди. Uzbekistan Airways`нинг Тошкентдан учаётган 146 нафар йўловчили биринчи HY57 рейси соат 21:55 да қўнди, деб хабар қилди Uzbekistan Airports матбуот хизмати.
Перронда турган аэропорт раҳбарияти ва ходимлари икки ҳафта ичидаги илк самолёт қўнишини қарсаклар билан қарши олди. Лайнер ҳаво аркаси ва миллий мусиқа билан кутиб олинди. Йўловчилар, жумладан, хорижлик сайёҳлар учун хоразмча нонлар тортилди.
Аэропорт 20 июль куни фаолиятини вақтинча тўхтатганди. Икки ҳафта ичида узунлиги 3000 м ва эни 45 м бўлган учиш-қўниш йўлаги қопламаси алмаштирилди ва мустаҳкамланди, иккинчи ва учинчи юриш йўлаклари капитал таъмирланди. Бу аэропортга Boeing787 ва AirbusA330 каби кенг фюзеляжли самолётларни чекловларсиз қабул қилиш ва, ўз навбатида, Урганч шаҳрига рейслар сони ва йўловчилар оқимини кўпайтириш имконини беради, дейилади хабарда.
Урганч аэропортидаги учиш-қўниш йўлагининг аввалги капитал реконструкцияси 1997 йилда амалга оширилган эди. Чизиқнинг қисман шикастланган қисмлари 2018 йилда таъмирланган.
Реконструкция лойиҳасининг пудратчиси «Urganch yo‘llardan muntazam foydalanish» ДУК, бош лойиҳачиси Niiat инжиниринг компанияси бўлди. Қопламанинг лаборатория тадқиқотлари Транспорт вазирлиги ҳузуридаги Транспорт соҳасида кадрларни қайта тайёрлаш ва малакасини ошириш институтининг таҳлилий-синов бўлими томонидан амалга оширилди.
Эслатиб ўтамиз, бир кун аввал Урганч аэропортини давлат-хусусий шериклик асосида модернизация қилиш ва бошқарувга ўтказиш бўйича тендер ўтказилиши эълон қилинган эди. Янги учиш-қўниш йўлаги, янги терминал ва бошқа иншоотлар қуриш режалаштирилган.
Фото
Урганч аэропорти тақдим этган фотолар:
