Демократик партиядан АҚШ президентлигига номзод Камала Ҳаррис Миннесота губернатори Тим Уолц вице-президентликка номзод бўлишини расман эълон қилди.
«Мен фахр билан Тим Уолцдан менинг шеригим бўлишни сўраганимни эълон қиламан. Губернатор, мураббий, ўқитувчи ва фахрий сифатида у ўзига ўхшаган ишчи оилалар учун барчасини қилди. У менинг жамоамда эканидан хурсандман», — деб ёзди Ҳаррис Х’да.
CNN маълумотларига кўра, вице-президентликка номзод бўлиш учун олти киши, жумладан, Пенсильвания губернатори Жош Шапиро ва аризоналик сенатор Марк Келли даъвогарлик қилган. Ўтган якшанба, 4 август куни Ҳаррис Уолц, Шапиро ва Келли билан учрашган.
Телеканалга кўра, Ҳаррис Уолцнинг ўзини тутишидан руҳланган ва улар якуний суҳбат давомида «илиқ муносабат»га эга бўлган. CNN манбасига кўра, Ҳаррис унинг «самимийлигидан» ҳайратда қолган.
«Камала Ҳарриснинг кампаниясига қўшилиш мен учун бир умрлик шарафдир. Мен тайёрман», — деб ёзди Уолц Ҳаррис ўз номзодини эълон қилганидан сўнг.
Ҳарриснинг танловини бир қатор таниқли демократлар, жумладан, АҚШнинг собиқ президенти Барак Обама ва АҚШ Конгресси Вакиллар палатасининг собиқ спикери Нэнси Пелоси қўллаб-қувватлади.
Тим Уолц ким?
60 ёшли Тим Уолц Небраскадаги кичик шаҳарчада туғилиб ўсган. У 24 йил АҚШ Миллий гвардиясида хизмат қилган. 2006 йилда Конгрессга сайланишидан олдин Уолц ўрта мактабларда ижтимоий фанлардан дарс берган ва футбол мураббийи бўлиб ишлаган.
У 2018 йилда Миннесота губернатори бўлган ва 2022 йилда қайта сайланган. Ўзининг раҳбарлиги даврида Уолц штатда аборт қилиш ҳуқуқларини қонун билан таъминлаган, рекреацион марихуанани қонунийлаштирган ва қурол сотиб олиш учун биографик маълумотлар текширувини кенгайтирган.
Уолц Миннесота штатини 2020 йилда Миннеаполисда Жорж Флойднинг ўлимидан кейин бошланган тартибсизликлар вақтида бошқарган. У тартибсизликларни бостириш учун Миллий гвардияни юборган.
The New York Times’нинг таъкидлашича, Уолц ўз штатида прогрессив қонунларни қабул қилгани билан кенг жамоатчиликка танилган, аммо яқинда у Республикачилар партиясидан президентликка номзод Дональд Трамп ва унинг шериги Жей Ди Вэнсни «ғалати йигитлар» деб атагач, янгиликлар юлдузига ва мемлар мавзусига айланди. Бу ибора ижтимоий тармоқларда «ўзига хос норасмий сайлов шиори» бўлиб қолди, деб ёзади газета.
https://twitter.com/Tim_Walz/status/1815804696805925377
АҚШда президентлик сайловлари 5 ноябрь куни бўлиб ўтади. Камала Ҳаррис амалдаги президент Жо Байден пойгадан чиққанидан кейин Демократик партиядан президентликка номзод бўлди.
