Самарқанд вилояти Каттақўрғон туманида газ тармоғига ноқонуний уланиш ҳолати фош этилди, деб хабар бермоқда Бош прокуратура.
Назорат тадбирида O.A.S.777 МЧЖ раҳбари У.О. ноқонуний оҳак ишлаб чиқариш цехи ташкил қилгани аниқланган. У қўлбола газ қурилмаларини (горелка) ўзбошимчалик билан ер остидан ўтган юқори босимли газ қувурига улаган.
Бунинг оқибатида 3 миллиард 394 миллион сўмлик 2 миллион 263 минг куб метр табиий газ ўғирланган.
Ҳолат юзасидан Жиноят кодексининг 169-моддаси 4-қисми «а» банди (Жуда кўп миқдорда ўғрилик) билан жиноят иши қўзғатилди, гумонланувчи У.О. процессуал тартибда ушланди.
БП тадбиркорларга фаолияти давомида энергия ресурсларидан қонуний ва оқилона фойдаланиши кераклигини эслатди. Хабарда қўшимча қилинишича, табиий газ ва электр энергиясидан ноқонуний фойдаланиш ҳолатларини фош этишга қаратилган кучайтирилган рейд тадбирлари давом этмоқда.
