Ўзбекистонлик боксчи Ҳасанбой Дўсматов Париж-2024 Олимпиадаси чемпиони бўлди.
51 килограммгача вазн тоифасида 2016 йилги Олимпия чемпиони, «Профессор» лақаби билан машҳур бўлган спортчи финал баҳсида жаҳон чемпионатининг икки карра бронза медали совриндори, Европа ўйинлари ва Европа чемпиони франциялик 26 ёшли Билол Беннама билан жанг қилди. Рақиблар 2023 йилда Тошкентда бўлиб ўтган жаҳон чемпионатида тўқнаш келган, ўшанда Дўсматов нокаут эвазига ғалаба қозонганди.
Биринчи раунд деярли тенгма-тенг ўтган бўлса-да, ўзбекистонликнинг бироз устунлиги сезилди — 3:2. Дўсматовнинг мураббийи ундан «публикага имконият қолдирмасликни» сўради. У рақиби билан бўй фарқига қарамай, кетма-кет зарбалар бериб, биринчи рақамда ҳаракат қилишда давом этди ва иккинчи раундни ҳам қўлга киритди — 4:1.
Ўзбекистонлик спортчи сўнгги уч дақиқаликни ҳам агрессив бошлади ва рақибидан устун келди. Дўсматов рақибининг бош ва тана қисмларига зарбалар берди. Учинчи раунд сўнгги дақиқаларида Франция вакили ташаббусни ўз қўлига олишга уринди, аммо андижонлик спортчи бунга қаршилик қилди. Учинчи раунд ҳам Дўсматовга насиб этди — 4:1. Умумий ҳисоб 5:0 — Ўзбекистон вакили фойдасига.
Бронза медалларини кабо-верделик Давид де Пина ва кубалик Юниор Алькантара Рейес қўлга киритди.
Ушбу ғалабадан сўнг Ўзбекистон 9 август куни учта олтин ва иккита бронза медали билан медаллар жадвалида 18-ўринга кўтарилиб олди.
Жанг видеоси
Шу тариқа Ҳасанбой Дўсматов Ўзбекистон тарихида Олимпия ўйинларида иккита олтин медални қўлга киритган биринчи боксчи бўлди ва таэквондочи Улуғбек Рашитов билан бир хил натижа қайд этди. Боксчи Баҳодир Жалолов ҳам 11 августга ўтар кечаси соат 01:51 да бўлиб ўтадиган финал жангидан сўнг ушбу рўйхатга қўшилиши мумкин.
Эслатиб ўтамиз, бокс бўйича Ўзбекистон эркаклар терма жамоасининг яна тўрт нафар вакили Олимпия ўйинларида «олтин» учун кураш олиб боради.
Хасанбой Маъруфжанович Дўсматов 1993 йил 24 июнда Андижон вилоятида туғилган. 2012 йилдан Ўзбекистон терма жамоаси вакили. Мураббийи: Зиятдин Тойганбоев. Рио-2016 Олимпиадасида Дўсматов 49 кг вазн тоифасида чемпион бўлган, шунингдек, энг яхши техникага эга боксчига бериладиган «Вэл Баркер» кубогини қўлга киритган.
У, шунингдек, Гамбургдаги 2017 йилги жаҳон чемпионати финалчиси. 2018 йилги Осиё ўйинларининг кумуш медали соҳиби. Уч карра Осиё чемпиони (2015, 2017 ва 2022). 2023 йилда Тошкентда ўтказилган жаҳон чемпионатида олтин медални қўлга киритган ва мусобақанинг энг яхши боксчиси деб топилган. Хизматлари учун «Ўзбекистон Республикасида хизмат кўрсатган спортчи» ва «Ўзбекистон ифтихори» фахрий унвонлари билан тақдирланган. Ханчжоу-2022 ёзги Осиё ўйинларида -51 кг вазн тоифасида олтин медални қўлга киритган.
