Шавкат Мирзиёев Париждаги Олимпия ўйинларида олтин медални қўлга киритиб, икки карра Олимпиада чемпиони бўлган таэквондочи Улуғбек Рашитов ва боксчи Ҳасанбой Дўсматов билан телефон орқали мулоқот қилди.
Давлат раҳбари спортчиларни табриклаб, миллий терма жамоа бир кунда иккита Олимпиада олтин медалини қўлга киритгани ўзбек спорти учун тарихий воқеа бўлганини таъкидлади.
У «йигитларимизнинг мардонавор ва ишончли ўйинлари, юксак маҳорат ва жасорати чинакам қаҳрамонлик намунаси бўлиб, Янги Ўзбекистоннинг ёшлари нималарга қодир эканини яна бир марта намойиш этиб, халқимизга улкан куч ва ғурур-ифтихор бағишлаганини» айтди.
Шавкат Мирзиёев уларнинг мураббийлари, ота-оналари ва яқинларига миннатдорчилик билдирди.
Шунингдек, у Улуғбек Рашитов ярим финалда жароҳат олганига қарамай, финалга қандай чиққани ва ғалаба қозонганини алоҳида қайд этди. Президент ўзбекистонлик уч йил аввал берган ваъдасида бажариб, яна Олимпиада «олтинини» қўлга киритганини таъкидлади.
«Мен сен билан ғурурланаман. Мана шундай фарзандим борлигидан бахтиёрман», — деди Шавкат Мирзиёев.
Президент Хасанбой Дўсматов ҳам сўзи устидан чиқиб, олтин медални қўлга киритганини таъкидлади.
«Мен ҳамма ўйинларни кўряпман, лекин сенинг ўйинингдан жуда ташвишда эдим. Лекин барча рақибларингга ҳеч қандай имконият қолдирмаганинг — менга ғурур, ифтихор, Янги Ўзбекистоннинг янги ёшлари нималарга қодир эканини кўрсатади… Сенинг [финал] жангингни нафас олмай кўрдик ҳаммамиз, нега десангиз, бу жанг бизга ҳаёт-мамотимиздек керак эди», — дейди у.
Улуғбек Рашитов ва Ҳасанбой Дўсматов «алоҳида эътибор ва юксак ишонч, спортчиларга барча шароитлар яратилгани учун» давлат раҳбарига миннатдорлик билдириб, ўз ғалабаларини Янги Ўзбекистонга бағишлашларини айтди, дейилади хабарда.
