Андижон вилоятида ноқонуний дори воситалари савдоси билан шуғулланган икки шахсга нисбатан ҳукм ўқилди. Бу ҳақда «Хавфсизлик» Telegram канали хабар қилди.
Қорасув шаҳрида яшовчи, 1983 йилда туғилган, муқаддам судланган А.Д. синфдоши Ш. Ж. билан ўзаро тил бириктириб, 2023 йилнинг август ойида Қирғизистонда истиқомат қилувчи шахслар томонидан Ўзбекистон ҳудудига давлат чегараси орқали ноқонуний ўтказилган 87 турдаги «Фокусин», «Допегит», «Когитум», «Эринит» ва бошқа дори воситаларини қабул қилиб олган вақтларида Давлат хавфсизлик хизмати ҳамда божхона органлари ходимлари томонидан ашёвий далиллар билан ушланди.
Баҳолаш фаолияти билан шуғулланувчи МЧЖ хулосасига кўра, дори воситаларининг умумий қиймати 1 миллиард 616 миллион 802 минг сўмни ташкил қилган.
Шунингдек, Соғлиқни сақлаш вазирлигининг «Фармацевтика маҳсулотлари хавфсизлиги маркази» ДМ экспертиза текшируви хулосасига кўра, ушбу дори воситаларининг маълум бир қисми тиббий буюмлар ва тиббий техникалар давлат рўйхатидан ўтмаган, давлат реестрига киритилмаган ҳамда уларга нисбатан мувофиқлик сертификатлари расмийлаштирилмаган.
Таъкидланишича, фуқаро А.Д. муқаддам уюшган гуруҳ таркибида валюта қимматликларини қонунга хилоф равишда ўтказиш ва божхона тўғрисидаги қонун ҳужжатларини бузиш жиноятларини содир этганлиги учун жиноий жавобгарликка тортилган.
Ҳолат юзасидан А.Д. ва Ш. Ж.га нисбатан ДХХ Андижон вилояти бўйича бошқармаси Тергов бўлими томонидан Жиноят кодексининг 182-моддаси 2-қисми «а» банди (Божхона тўғрисидаги қонунчиликни бузиш) билан жиноят иши қўзғатилиб, тергов ҳаракатлари олиб борилди.
Жиноят ишлари бўйича Қўрғонтепа туман суди томонидан эса А.Д.га нисбатан 5 йил ҳамда Ш. Ж.га нисбатан 3 йил муддатга озодликдан маҳрум қилиш жазоси тайинланди.
