Буюк Британия терма жамоасининг икки нафар ёрдамчи ходими Олимпия ўйинларида бокс бўйича Ўзбекистон терма жамоаси бош мураббийи Тўлқин Қиличевнинг ҳаётини сақлаб қолишга ёрдам берди. Бу ҳақда Британия жамоаси физиотерапевтига таяниб, The Guardian, PA Agency ва мамлакат бокс федерацияси хабар берди.
Маълум қилинишича, «Ролан-Гаррос» стадионининг машғулот ҳудудида финалда франциялик Билол Беннамани мағлуб этган Хасанбой Дўсматовнинг олтин медалини нишонлаш чоғида 41 ёшли Тўлқин Қиличевнинг юраги хуруж қилган.
Боксчи Ҳасанбой Дўсматов, унинг мураббийи Зиятдинбек Тойғонбоев (чапда) ва Ўзбекистон бокс жамоаси бош мураббийи Тўлқин Қиличев (ўнгда) икки рақамини кўрсатиб Дўсматовнинг Олимпиададаги иккинчи олтин медали эканига ишора қилишмоқда.
Буюк Британиянинг бокс бўйича шифокори Харж Сингх ва физиотерапевт Робби Лиллис ҳам машғулот ҳудуди яқинида бўлишган ва унга шошилинч ёрдам кўрсатишган. Сингх сунъий нафас берган, Лиллис эса дефибриллятор амалиётини қўллаган.
«Ўзбекистон мураббийлар жамоаси машғулот жойига қайтиб келишди ва уларнинг барчаси ғалабани нишонлади, сўнгра бу ҳудуддан байрам билан боғлиқ бўлмаган ҳайқириқлар эшитилди. Шифокорларни чақиринг, деган овозлар бўлди. Харж биринчи бўлиб ёрдамга югурди ва мен унинг орқасидан қўлимдаги сумка билан эргашдим», — деди Лиллис.
«Мен хонага 30 сония ўтиб етиб келганимда, Харж аллақачон мураббийда юрак-ўпка реанимациясини бажаришни бошлаган эди. Бир неча мураббийлар вазиятдан хавотирда эдилар, шунинг учун уларни ўзига келтиришга бироз вақт керак бўлди. Мен травма сумкасини очдим, дефибрилаторни чиқариб, иложи борича тезроқ ёстиқчаларни қўйдим. Биз унинг юрак уриш тезлигини таҳлил қилганимиздан сўнг, у шок кераклигини айтди, шунинг учун биз ҳаммани чиқариб юбордик ва буни қилдик», — деди у.
Унинг сўзларига кўра, Тўлқин Қиличев Харж сунъий нафас беришни давом эттиргандан сўнг тахминан 20−30 сонияларда ҳушига келган.
Қиличев ҳозирда касалхонага ётқизилган, унинг аҳволи барқарор, деб баҳоланмоқда.
Лиллис пайшанба куни кечқурун воқеадан кейин умуман ухламаганини айтди: «Шубҳасиз, ўша пайтда бу вазиятни ҳал қилиш қандайдир адреналин бўлди. Мен ўз вазифамни бажардим ва кимнингдир омон қолишига ёрдам берганимдан миннатдорман».
Ўзбекистон терма жамоаси мураббийлар штаби тафсилотларга изоҳ бермади ва Тўлқин Қиличев билан «ҳаммаси жойида, у ҳозир анча яхши» эканини айтишди.
