Шавкат Мирзиёев спортчиларнинг Париж Олимпиадасидаги иштироки муносабати билан халқни табриклади. Бу ҳақда давлат раҳбари матбуот хизмати хабар берди.
«Токио Олимпиадасидан кейин яхши ният билан топ-15 га кирамиз деб, олдимизга катта мақсад қўйган эдик. 208 та давлат вакиллари қатнашган мусобақада спортчиларимиз юксак матонат, маҳорат ва ирода кўрсатиб, дунёда 13-ўрин, Осиёда 4-ўрин, туркий, мусулмон ва МДҲ давлатлари орасида 1-ўринни эгаллади. Бирйўла 3 нафар спортчимиз „икки карра олимпия чемпиони“, деган юксак шарафли номга сазовор бўлди», — деди президент.
«Бу янги Ўзбекистон ёшлари нимага қодир эканини бутун дунёга кўрсатиб, уларнинг натижалари тарихимизда зарҳал ҳарфлар билан муҳрланди», — деди у.
«Барча спортчиларимиз, уларнинг ота-оналари, устоз ва мураббийлари янги Ўзбекистоннинг чинакам қаҳрамонларидир! Улар билан ҳар қанча фахрлансак арзийди, улар бизнинг ғуруримиз!» — деди давлат раҳбари.
Париждаги Олимпиада Ўзбекистон учун мамлакат мустақил тараққиёти тарихида энг муваффақиятлиси бўлди, жамоа жами 90 нафар спортчи юборганди. Улар мусобақада 13 та медаль — 8 та олтин, 2 та кумуш ва 3 та бронзани қўлга киритди.
Аввалроқ президент боксчилар Баҳодир Жалолов ва Абдумалик Халоков, эркин курашчи Разамбек Жамалов, таэквондочи Светлана Осипова ва оғир атлетикачи Акбар Жўраев ҳамда эркин курашчи Ғуломжон Абдуллаев билан телефон орқали мулоқот қилганди.
Шунингдек, президент телефон орқали Улуғбек Рашитов ва Ҳасанбой Дўсматовни Олимпиададаги ғалабаси билан табриклаган.
