Ўзбекистонда қуёш панелларини ўрнатишда ер ва мол-мулк солиғи имтиёзларидан тўлиқ фойдаланиш бўйича чеклов бекор қилинади. Шавкат Мирзиёев 12 август, душанба кунги йиғилишда Солиқ қўмитасига шундай кўрсатма берди.
2023 йил 1 апрелдан бошлаб қайта тикланувчи энергия манбалари учун қуввати 100 кВтгача бўлган ускуналар ўрнатган жисмоний ва юридик шахслар ушбу ускуна учун мол-мулк солиғи, у эгаллаб турган участка учун ер солиғи (Солиқ кодекси 428-моддаси) ва ишлаб чиқарилган энергияни сотишдан олинган фойда солиғини тўлашдан озод қилинган.
Президентнинг жорий йил 10 январдаги қарори билан имтиёзлар бериш тартибига ўзгартиришлар киритилган.
Хусусан, умумий қуввати 100 кВт гача бўлган ҚТЭМ қурилмаларини ўрнатган ва фойдаланувчи шахслар фойдаланишга топширилган кундан бошлаб 3 йил муддатга қуйидаги солиқларни тўлашдан озод қилинади:
- ушбу қурилмалар бўйича — юридик шахсларнинг мол-мулкига солинадиган солиқни, алоҳида турувчи қурилмалар билан банд бўлган ер участкалари бўйича — юридик шахслардан олинадиган ер солиғини, электр энергиясини умумий тармоққа сотишдан олинган фойда бўйича — фойда солиғини;
- уй-жой фондининг кўчмас мулк объектлари бўйича жисмоний шахслардан олинадиган мол-мулк солиғи ва жисмоний шахслардан олинадиган ер солиғи (бунгача — фақат жиҳозлар эгаллаган қисми учун)
Агар қурилмалар ўрнатилаётган қуёш панеллари қувватининг 25 фоизидан кам бўлмаган қувватини ташкил этадиган электр энергиясини сақлаш тизими билан ўрнатилган бўлса, ушбу кичик бандда назарда тутилган солиқ имтиёзлари улар фойдаланишга топширилган кундан бошлаб ўн йил муддатга қўлланади.
Жисмоний шахслар умумий қуввати 1 кВтдан ортиқ ҚТЭМ қурилмалари ўрнатганда имтиёзлар ҳар бир объект бўйича бир маротаба қўлланади.
Бунда солиқ имтиёзларининг йиллик миқдори жисмоний шахслардан олинадиган мол-мулк солиғи бўйича — БҲМнинг икки бараваридан (680 минг сўм), жисмоний шахслардан олинадиган ер солиғи бўйича эса — БҲМдан (340 минг сўм) ошмаслиги лозим.
Бироқ ушбу ўзгартиришлар ҳали Солиқ кодексига киритилмаган, шунинг учун ҳам уларни амалда қўллаш мумкин эмас.
Президент иқтисодиёт мажмуаси раҳбариятига (бош вазир ўринбосари Жамшид Қўчқоров раҳбарлигида) аҳоли ва тадбиркорлар учун энергия тежовчи ускуналар ва қуёш батареялари харид қилиш имкониятларини кенгайтириш топшириқларини ҳам берди.
