Ўзбекистонда аҳолига суюлтирилган газ етказиб бериш учун хусусий сектор жалб этилиши мумкин. Президент Шавкат Мирзиёев 12 август куни бўлиб ўтган йиғилишда ушбу масалани ўрганиб, тегишли таклифлар киритишга кўрсатма берди.
Февраль ойида президентга Ўзбекистоннинг энергетик хавфсизлигини таъминлаш чора-тадбирлари тақдимот қилинганди. Хусусан, 1 октябрга қадар камида бешта туманда аҳолига суюлтирилган газ (пропан) етказиб бериш функциясини хусусий операторга ўтказиш таклиф этилган.
Шунингдек, таклилар газ ва электр энергияси тарифларини ислоҳ қилиш ва ижтимоий нормаларни жорий этиш, 49 млрд долларлик электр энергиясини харид қилиш бўйича келишувларни қайта расмийлаштириш, Самарқанд шаҳрида электр энергиясини тақсимлаш ва сотиш бўйича инвесторларни жалб қилиш ва бошқаларни ўз ичига олганди.
Табиий ва суюлтирилган газни истеъмолчиларга етказиб бериш бўйича монополияни бекор қилиш ва паст босимли газ тақсимлаш тармоқларини бошқаришга хусусий секторни жалб қилиш 2024 йилги давлат дастуридан ўрин олган.
24 май ҳолатига кўра, Ўзбекистонда 4,26 млн оила ва 81 мингдан ортиқ корхона табиий газ олади. Суюлтирилган газ 3,73 млн истеъмолчига (46,7 фоиз), шунингдек, 2917 нафар улгуржи истеъмолчига етказиб берилади. 1 майдан бошлаб аҳоли учун суюлтирилган газ тарифи 1 кг учун 1120 сўмдан 1600 сўмга, 2025 йил 1 апрелдан эса 2000 сўмга кўтарилади.
Август ойи бошида «Газета.uz» пропан нархи кескин ошгани ҳақида хабар берганди. Ўзбекистон товар-хом ашё биржаси (UzEx) маълумотларига кўра, суюлтирилган газ (пропан) нархи 1 июнь куни бир тонна учун 5,2 млн сўмни ташкил этган бўлса, 1 июлда бир тонна учун 6,02 млн сўмни ташкил қилган, 31 июлга келиб бу кўрсаткич 7 млн сўмга кўтарилган, яъни ойига 25 фоизга, икки ойга 44 фоизга ошган.
Рақобатни ривожлантириш ва истеъмолчилар ҳуқуқларини ҳимоя қилиш қўмитаси вазиятни ўрганаётганини билдирган. Шунингдек, қўмита нархларнинг ошиши мумкинлиги олдиндан прогноз қилингани ва бу ҳақда регуляторни (Энергетика вазирлиги) 15 июль куни хабардор қилганини маълум қилган.
11 август кунги савдолар якунларига кўра, бир тонна пропан нархи 7,85 млн сўмга кўтарилган.
