Рақобатни ривожлантириш ва истеъмолчилар ҳуқуқларини ҳимоя қилиш қўмитаси Orient Group Management холдингига нисбатан иш очди, дея хабар қилди қўмита матбуот хизмати.

Қўмита маълумотларига кўра, Orient Group Management компанияси устав фондини кўпайтириш ҳисобига Highway Logistics Center транспорт-логистика марказининг 45 фоиз улушига эгалик қила бошлаган, бироқ монополияга қарши органнинг розилигини олмаган.

«Рақобат тўғрисида»ги қонуннинг 26-моддасига мувофиқ, бундай операцияларда монополияга қарши органнинг олдиндан розилиги талаб қилинади.

"Газета.uz"да реклама

Қўмита махсус комиссияси томонидан Orient Group Management компаниясига нисбатан иш қўзғатилиб, қонуннинг 26-моддасини бузганликда айбдор деб топилган ва жарима солинган.

Orient қарорга эътироз билдириш учун судга мурожаат қилган, дейилади хабарда.

Бундан ташқари, қўмита 23 июль куни Ўзбекистон-Ўмон инвестиция компаниясига (UOIC, 75 фоизи Ўмон инвестиция идорасига тегишли, 25 фоизи Тикланиш ва тараққиёт жамғармасига тегишли) ҳам иш очган. Компания монополияга қарши органнинг розилигисиз Highway Logistics Center`нинг устав фондидан 45 фоиз улуш олган. У ҳам жаримага тортилган.

Компаниялар ҳақида

Highway Logistics Center 2017 йил 8 сентябрда ташкил этилган бўлиб, устав капитали 185,67 млрд сўм. Май ойининг бошида компания Logistics Orient (99%) ва Жаҳонгир Жетибаевич Полатовга тегишли эди. Полатов, шунингдек, қуйидаги компанияларга ёки акцияларига эгалик қилади:

  • BeFit фитнес клублари тармоғи (BeFit Fitness and Wellness Center, BeFit-Eco, BeFit Crossfit);
  • Bright-Development (тайёр бетон ишлаб чиқариш / турар жой бўлмаган биноларни ижарага олиш ва бошқариш);
  • Oriental Paper and Board (қоғоз маҳсулотлари ва картон етказиб бериш);
  • My IMG (транспорт ва ёқилғи сарфини назорат қилишнинг GPS мониторинги);
  • Tok Bor электр ёқилғи қуйиш шохобчалари ва зарядлаш станциялари тармоғи;
  • International Monitoring Group (транспортлар спутник мониторинги);
  • Central Asian Diamond (турар-жой бўлмаган биноларнинг брендинги ва бошқаруви, баъзи веб-сайтларда ҳашаматли Италия заргарлик буюмлари Pasquale Bruni брендининг расмий вакили сифатида кўрсатилган);
  • Igrushki Dlya Nas (Urban XS Toys ўйинчоқ дўконлари);
  • Central Beton (тайёр бетон ишлаб чиқариш);
  • Profit Store («Мираторг», Vici, Lurpak, Toybox, Chocopie Lotte, Konti, Joyco, Schweppes ва бошқалар озиқ-овқат маҳсулотларини тарқатувчи);
  • Khivan Gold (заргарлик буюмлари ишлаб чиқариш);
  • VVGold (заргарлик буюмлари ишлаб чиқариш);
  • SAAS Market (бухгалтерия ҳисоби соҳасидаги фаолият);
  • ва бошқалар.

Ҳозирда акциялар қуйидагича тақсимланган: Logistics Orient (50,86 фоиз), Ўзбекистон-Ўмон инвестиция компанияси (49,12 фоиз), Жасур Алишерович Султонов (0,02 фоиз).

Orient Group Management компанияси Рауф Мирзаевич Комилжанов (44,99 фоиз, Garant Bank акциядори ҳам), Сакен Жетибаевич Полатов (33,5 фоиз, Orient Group асосчиси, Orient Finans Bank кузатув кенгаши раиси) ва Пайзуллажон Раҳматуллаевич Мирзаев (16 фоиз, Orient Group асосчиси) тегишли.

Компания, шунингдек, Makro (Darvoza Savdo) супермаркетлар тармоғи ва Бектемир металл конструкциялари заводига эгалик қилади.