Самарқанд вилояти Булунғур туманида яшовчи Ситора Турдибекова Париж-2024 ёзги Олимпия ўйинларида иштироки учун туманида 1 хонали уй ва эсдалик совғалари билан тақдирланди.
Булунғур ҳокимлиги матбуот хизматининг «Газета.uz»га аниқлик киритишича, хонадон ҳокимлик маблағлари ҳисобидан эмас, балки тадбиркор томонидан ҳадя қилинган. Туман маъмурияти спортчи ва унинг мураббийига эсдалик совғалари бериш билан чекланган.
«Мусобақа жуда яхши ўтди. Яши тайёргарлик кўриб, натижа қилиш учун борган эдик, аммо насиб қилмади. Худо хоҳласа, кейинги мусобақаларда натижа қиламиз, деган умиддамиз», — деди спортчи.
Ситора Турдибекова 2019 йилдан буён миллий терма жамоа аъзоси ҳисобланади. У 2021 йил катталар ўртасидаги Осиё чемпионатида олтин медални қўлга киритган. 2022 йил Тошкентда ўтган U-22 қитъа биринчилигида бронза, 2023 йил Бангкок мезбонлик қилган айни шу тоифадаги чемпионатда эса кумуш медаль соҳибига айланган. Кўрсатган натижалари эвазига «Шуҳрат» медали билан тақдирланган.
Турдибекова Ханчжоу-2022 ёзги Осиё ўйинларидаги муваффақиятли иштироки орқали -57 кг вазн тоифасида Париж-2024 ёзги Олимпия ўйинлари йўлланмасини олган.
Боксчи Париж-2024 ёзги Олимпия ўйинларида 57 кг вазн тоифасида илк баҳсини конголик Марселат Сакоби Матшуни билан ўтказиб, уни 3:2 ҳисобида енгган. Сўнгра 1/8 финалда икки карра жаҳон чемпиони Хитой Тайпейи вакили Лин Ю Тингга қарши жанг қилган, бироқ имкониятни бой бериб (5:0), Олимпиададаги иштирокини якунлаган.
Лин Ю Тинг финалда польшалик Юлия Шереметани мағлубиятга учратиб, олтин медални қўлга киритган. Чемпионлик сари йўлда у ва жазоирлик бошқа боксчи гўёки эркак бўла туриб, аёллар билан беллашганликда айблана бошланди. Интернетда ҳануз унинг жинси ҳақидаги баҳс-мунозаралар давом этмоқда.
Лин Ю Тинг ва Ситора Турдибекова. Фото: Миллий олимпия қўмитаси.
13 август куни бош вазир Абдулла Арипов ҳам жонли эфирда ўтказилган олимпия терма жамоасини расмий кутиб олиш маросимида ўзбекистонлик спортчи мағлуб бўлган Ситора Турдибекова ва Лин Ю Тинг ўртасидаги бокс учрашуви ҳақида фикр билдирган.
«Айрим спортчиларимиз ҳар хил сабабларга кўра медаллар соҳиби бўла олишмади. Бунга ўтган сафар ҳам айтиб ўтганимиздек, ҳакамликдаги ноаниқликлар ва бошқа сабаблар бўлиши мумкин. Энг ёмони бу гал, ўйлайманки, бизнинг халқимизга ҳам умуман ёқмаган нарса бу — эркак, болаларнинг аёллар кийимини кийиб чиққани бўлди. Бу, умуман, ҳеч қанақасига қабул қилиб бўлмайдиган [ҳолат]. Шунда ҳам бизнинг Ситорахон [Турдибекова] қизимиз ўша Тайванми, Таипейиданми келган эркак-йигит билан охиригача, қўрқмасдан тушиб, [жанг қилди]», — деди Абдулла Арипов.
«Газета.uz» Халқаро Олимпия қўмитаси ва Тайвань ёнини олган боксчи билан боғлиқ жанжал тафсилотларини ўрганганди.
Эслатиб ўтамиз, Олимпиада ғолиблари ва совриндорларига 50 мингдан 200 минг долларгача бўлган пул мукофотлари, Tahoe ва BYD Song Plus автомобиллари, шунингдек, икки қаватли коттежлар ва квартиралар берилди. «Президент совғаси» деб ёзилган мукофотларни бош вазир ва Сенат раиси топширди.
