14 август куни Тошкент шаҳридаги «Л-Паркентский-1» электр тармоғи ва «Лафарга» подстанциясида носозлик юзага келди. Бу ҳақда Энергетика вазирлиги матбуот хизмати хабар қилди.
Вазирликнинг ёзишича, бунинг оқибатида Мирзо Улуғбек ва Яшнобод тумани истеъмолчилари қисман (3 140 та) электр таъминотидан узилди.
Ҳудуд аҳолиси шаҳар ҳокимлигининг Уй-жой коммунал хизмат кўрсатиш бош бошқармаси марказий диспетчерлик хизмати Telegram гуруҳи орқали яшаш уйида электр йўқлигидан шикоят қилмоқда.
Telegram гуруҳдаги айрим мурожаатлар.
Хусусан, Паркент кўчасида 5−6 соат, Риёзий ва Яланғоч массивларида 4 соатдан буён чироқ йўқлиги, бунинг оқибатида сув ҳам келмаётгани айтилмоқда. Олтинтепа кўчасида яшовчи истеъмолчилардан бири эса кун давомида 12 соат электр таъминланмаганини ёзди.
Энергетика вазирлиги соат 21:56 ҳисобида носозликликларни бартараф этиш ишлари олиб борилаётганини ва қисқа вақт ичида бартараф этилишини айтди ва келтирилган ноқулайликлар учун истеъмолчилардан узр сўради.
Марказий диспетчерлик хизмати эса соат 23:48 да электр таъминоти «тахминан 2 соатларда» тикланишини маълум қилди.
