Ҳиндистоннинг Ғарбий Бенгалия штатида 14 дан 15 августга ўтар кечаси ўн минглаб аёллар гендер зўравонлигига қарши кўчага чиқди, деб хабар бермоқда BBC News.
Марш Reclaim the Night («Тунни ўзингга қайтар») деб номланди ва, BBC’нинг таъкидлашича, ўтган ҳафта Калькуттадаги давлат шифохонасида 31 ёшли аёл шифокорнинг зўрлангани ва ўлдирилгани ортидан бошланган деярли бир ҳафталик намойишларнинг кульминацияси бўлди.
Стажёр ҳамширанинг ўлдирилиши 9 август куни содир бўлган. 36 соатлик сменадан сўнг у махсус дам олиш жойи йўқлиги сабабли семинар хонасида ухлаб қолган. Эртасига эрталаб ҳамкасблари унинг ярим яланғоч танасини оғир жароҳатлар билан топган. Кейинроқ касалхона волонтёри қотилликда гумонланиб ҳибсга олинган.
Аёллар ёнаётган машъалалар, плакатлар ва Ҳиндистон байроқлари билан адолат талаб қилди. Уларга ёш ва кекса эркаклар ҳам қўшилди.
«Гап фақат бир кечада эмас. Ҳар кеча аёллар эркин бўлиши ва кўчага чиқиш имкониятига эга бўлиши керакки, келажакда ҳеч қайси қизнинг ота-онаси кеч бўлганда фарзандим уйга соғ-саломат қайтадими ёки йўқми, деб ўйламаслиги лозим», — дейди намойишчилардан бири.
Кичик норозилик намойишлари Ҳиндистоннинг бошқа кўплаб шаҳарларида — Деҳли, Ҳайдаробод, Мумбай ва Пунеда ҳам бўлиб ўтди.
