«U-23 футбол терма жамоасининг барча футболчилари, мураббийлари ва бутун персонали Ўзбекистон ва бутун Марказий Осиёни тўғридан-тўғри Олимпия ўйинларига етаклаган биринчи жамоа сифатида тарихга кирган қаҳрамонлардир. Фильмимиз орқали Тимур Кападзе бошчилигидаги ёш йигитлар Олимпия ўйинларига йўлни қандай босиб ўтгани, спортдаги катта ютуқлар замирида қандай меҳнатлар туриши ҳақида ҳикоя қилмоқчимиз», — деди «Газета.uz» директори Давлат Умаров.
2024 йил июнь ойида «Газета.uz» DBLA гибрид продакшн-студияси ёрдамида таҳририятнинг биринчи ҳужжатли фильмини суратга олишни бошлади.
«Фильмимиз ўз меҳнати ва матонати эвазига кўп тўсиқларни енгиб ўтиб, бутун халқнинг узоқ йиллик орзуси — Олимпия ўйинларига йўлланмани қўлга киритган ўзбек футболининг янги қаҳрамонлари ҳикоясини очиб беради. Ўзбекистон футбол ассоциацияси ва жамоа бош мураббийи Тимур Кападзе ғоямизни қўллаб-қувватлашди ва бутун мамлакат учун тарихий лаҳзаларни суратга олишимиз учун олимпиячиларимизнинг машғулотлари ва йиғинларида иштирок этиш имкониятини тақдим этишди. Биз июнь ойида суратга олишни бошладик ва жамоа билан Тошкент ва Франциядаги учта йиғинда қатнашдик, шундан сўнг Париждаги ўйинлар бошланишидан олдин уларни Олимпия шаҳарчасига кузатдик.
Жамоамиз учун бу — мамлакатнинг турли бурчакларидан келган оддий йигитларнинг бир мақсад йўлида бирлашгани ҳақидаги ҳикоя. Ўзбек халқи учун бу бизнинг футболчилар ўйнаган катта миқёсдаги биринчи турнир эди. Жамоамизнинг Олимпия ўйинларидаги чиқишлари кўплаб мухлисларни бирлаштириб, уларда ёқимли ҳиссиётлар қолдирди ва ўзига хос ғурур туйғусини уйғотди. Айтиш мумкинки, жамоанинг барча ўйинлари телевидение қаршисида миллионлаб ўзбекистонликларни бирлаштирди", — дейди Давлат Умаров.
Машғулот йиғинлари. Фото: Евгений Сорочин / «Газета.uz»
«„Газета.uz“ колумнисти Дмитрий Поваров ёзганидек: „Кападзенинг мураббийлар штаби ва Олимпиадага йўл олган ҳар бир киши юқорига олиб борадиган йўлни топди. Бугунги футболдаги ягона тўғри йўлни“. Бизнинг фильм Парижга олиб борган йўлни унутмасликка ёрдам беради», — дея таъкидлайди таҳририят директори.
Тўлиқ метражли ҳужжатли фильмнинг ишчи номи — «Муваффақият омили» / «Фактор успеха».
Август ойида суратга олиш ишлари Тошкент шаҳри, Наманган, Фарғона, Қашқадарё ва Жиззах вилоятларида давом этади. Фильмнинг премьераси ноябрь ойининг бошида бўлиб ўтади, сўнгра фильмни «Газета.uz» платформаларида томоша қилиш мумкин бўлади.
Суратга олиш ишлари «Газета.uz» фильмининг бош ҳамкорлари — Ishonch ва United Cement Group компаниялари кўмагида олиб борилмоқда.
