«Ўзбеккино» миллий агентлиги кино ишлаб чиқаришни тўхтатсагина, соҳада олдинга силжиш бўлади. Агентлик кино олиш билан шуғулланмаслиги, фақат буюртмачи сифатида хусусий ширкатларни қўллаб-қувватлаши керак. Бу ҳақда 16 август куни АОКАда ўтказилган матбуот анжуманида маданият вазири Озодбек Назарбеков айтиб ўтди, дея хабар бермоқда «Газета.uz» мухбири.
«Ўзбек киноси соҳасидаги ҳолатни кечагидан бугунгиси яхши, деб айтамиз. Лекин кино масаласида натижа нуқтаи назаридан барибир ҳали катта ютуққа эришдик деб айта олмайман. Хабарларингиз бор, бу йилдан „Ўзбеккино“ миллий агентлиги (Кинематография агентлиги назар тутилмоқда — таҳр.) Маданият вазирлиги тасарруфига ўтди. Биз ҳозир агентлик фаолиятини ичидан бутунлай ўрганяпмиз. Менга вазир сифатида кино бўйича нима хулоса қилдинг, десангиз, мен айтаманки, „Ўзбеккино“ кино ишлаб чиқаришни тўхтатса, кейин ривожланиш, олдинга юриш бўлади. Бунинг учун „Ўзбеккино“ кино олмаслиги, бу иш билан шуғулланмаслиги керак, фақат буюртмачи бўлиб, ғояни бериб, хусусий ширкатларни ривожлантириши ва уларни қўллаб-қувватлаши керак. Ана шундагина ижодкорлар эркин ижод қилади», — деди Назарбеков.
Унинг қайд этишича, ҳозир ижодкорларнинг эркинлиги нуқтаи назардан барибир кино соҳаси ҳали мутлақ эркин эмас, ижодкорлар ўзи хоҳлаганидек ижод қилмаяпти.
«Аммо эркин қўйсак, иккинчи тарафига чидашимиз керак. Сиз айтгандек, эркин қўйилса, маънан саёз кинолар олиняпти. Иккаласида ҳам муаммо бор, яъни эркин қўйса ҳам, эркин қўймаса ҳам муаммо бор. Яхши ижодкорнинг қўлига яхши асарнинг етиб бормаётганининг биринчи сабаби — «Ўзбеккино»нинг ўзи кино оляпти, яхши асарни ҳеч қачон бировга бермайди. «Ўзбеккино»га сизни раҳбар қилса, сиз ҳам бермайсиз, яхши асарни ўзим кино қиламан, дейсиз. Мана шу каби муаммоларни аста-секин кўриб, таҳлил қилиб, қайсидир ҳужжатларда акс эттириб, ислоҳотига чиқиб боряпмиз. Лекин кинонинг аҳволи кечагисидан бугуни анча яхши», — деди вазир.
Эслатиб ўтамиз, президентнинг 2021 йил апрелдаги фармони билан «Ўзбеккино» миллий агентлиги Кинематография агентлиги этиб қайта номланган. 2019 йилдан бери агентликни бошқариб келган Фирдавс Абдухолиқов 2024 йил 5 июнь куни лавозимидан озод этилиб, Ислом цивилизацияси маркази директори бўлди. Унинг ўрнини 2017 йилдан буён Кинематография агентлиги директори ўринбосари лавозимида фаолият юритиб келган Шуҳрат Ризаев эгаллаган.
Кинорежиссёр Сарвар Каримов «Газета.uz»нинг «Мифономика» лойиҳасида меҳмон бўлиб, солиқ тўловчиларнинг пулларини кино соҳасига ажратиш қанчалик ўринли экани ҳақидаги фикрлари билан бўлишганди.
«Ўзбекистон бугунги кунда кинога пул беришни тўхтатиши ёки қаттиқ чеклаши керак деб ҳисоблайман. Умуман олганда, бизга Маданият вазирлиги керакми? Вазирлик тузилмасида бўлган „Ўзбекнаво“, „Ўзбеккино“ ташкилотлари бизга керакми, деган саволни давлатимиз ўз олдига қўйиши керак», — деган эди Сарвар Каримов.
