Француз актёри Ален Делон 88 ёшида вафот этди. Бу ҳақда унинг фарзандлари AFP`га маълум қилди. Ўлим сабаблари ҳозирча номаълум.
«Ален Фабен, Аннушка, Энтони, шунингдек Лубо [унинг ити] улкан андуҳ билан ўз отаси кетгани ҳақида маълум қилади. У Душидаги ўз уйида, ўзининг уч фарзанди қуршовида қийналмасдан абадий уйқуга кетди», — дейилади хабарда.
2000 йилда Ален Делон Швейцария фуқаролигини олган ва узоқ вақт Женевада яшаган. 2019 йилда у алцгеймер касаллигининг ривожланишига туртки бўлган инсултни бошдан кечирган. Сўнгра Делон Швейцариянинг L’Illustre нашрига эвтаназияга қарши эмаслигини айтган. 2022 йилнинг март ойида актёрнинг ўғли Энтони Дело бу қадамни қўйишга қарор қилганида отасига ҳамроҳлик қилишини маълум қилган.
Ален Делон 1935 йил 8 ноябрда Париж чеккасида туғилган. 1957 йилда илк бор унга «Аёл аралашганда» (Quand la femme s’en mêle) картинасидан рол таклиф этишган ва у шу тариқа актёрга айланган.
Делон экрандаги дебютидан уч йил ўтгач, «Рокко ва унинг биродарлар» (1960) криминал драмасидаги бош роли учун халқаро эътирофга сазовор бўлган. У, шунингдек, 80 га яқин филмларда, жумладан «Самурай», «Борсалино», «Икки шаҳарча», «Зорро», «Месе Кляйн», «Оққуш севгиси», «Теҳрон-43» каби фильмларда эсда қоларли ролларни ижро этган.
Унинг фаолияти халқаро кинофестивалларда кўплаб мукофотларга сазовор бўлган, жумладан французларнинг «Сезар» миллий киномукофоти, Американинг «Олтин глобуси»ни олган.
2017 йилнинг май ойида Делон кино карьерасини якунлаган. «Мен, худди ортиқча жанг ўтказишни истамайдиган боксчи каби ортиқча филмларда суратга тушишни истамайман», — дея изоҳлаган у.
