18 августдан олий таълим муассасаларининг бакалавриат таълим йўналишларига кириш тест синовлари натижасидан норози бўлган абитуриентларнинг апеллация аризаларини қабул қилиш бошланди.
Билим ва малакаларни баҳолаш агентлигининг хабар қилишича, аризани my.uzbmb.uz сайтида (шахсий кабинети орқали) онлайн тарзда 27 августга қадар (10 кун давомида) бериш мумкин.
Абитуриент апеллация шикояти бериши учун тест синовида иштирок этган ва тест синовидан четлатилмаган бўлиши лозим.
Ариза берган абитуриентга уни кўриб чиқиш санаси ва вақти кўрсатилган хабарнома берилади. Унда белгиланган вақтда шахсини тасдиқловчи ҳужжат ва хабарнома билан агентликка келиши керак.
Шикоятларни кўриб чиқиш 2024 йил 22 августдан бошланади.
Эслатиб ўтамиз, тест натижалари 17 август куни эълон қилинди. Уларни 4 усулда билиш мумкин.
Маълумот учун, 2024 йилда 737 минг 351 нафар абитуриент тестга кирди. Бу ўтган йилгига (888 минг 472 нафар) қараганда 151 мингга кам. Тестга кирган абитуриентларнинг 345 минг 869 нафари (46,9 фоиз) 56,7 баллни ҳам тўплай олмаган. 56,7 дан кўпроқ балл тўплаган абитуриентлар сони 391 минг 482 нафарни (53,1 фоиз) ташкил қилади.
