Тошкент давлат циркининг функцияларини бутунлай ўзгартириб, уни хусусий бошқарувга бериш керак. Бу ҳақда 16 август куни АОКАда ўтказилган матбуот анжуманида маданият вазири Озодбек Назарбеков гапирди, дея хабар бермоқда «Газета.uz» мухбири.
Тадбирда журналистлар томонидан Тошкент циркининг биноси ачинарли аҳволга келиб қолгани ва цикр жамоасининг репертуарида деярли янгилик йўқлиги, ҳар доим бир хил томошалар қўйилиши ҳақида танқидий фикрлар билдирилиб, бу борада қандай режалар борлиги сўралди.
Озодбек Назарбековнинг қайд этишича, давлат учун циркдаги битта ҳайвонни боқиш бир инсонни боқишдан қимматга тушмоқда.
«Тошкент цирки битта муассаса бўлгани билан, у катта ташкилот ва катта жамоа фаолият юритади, масаласи ҳам жуда кўп. У ерда ҳозир битта ҳайвонни боқиш бир инсонни боқишдан қимматга тушади давлатга. Чунки циркда ноёб ҳайвонлар бор, уларга вақтида қараб туриш керак, вакцинасини қилиш керак. Цирк ҳар куни фаолият юритса ҳам, кунига 5−10 та сеанс қўйса ҳам, топган пули билан шунча ҳайвонлари ва ходимларини боқиб тура олмайди, пули бунга етмайди. Цирк сақлаб туриш жуда қиммат турадиган фаолият тури ҳисобланади», — деди вазир.
Фото: АОКА
Унинг сўзларига кўра, цирк хусусийлаштирилса, кейин ривожланиш бўлади.
«Бугунги кунда дунёда циркларнинг ҳолати нима бўляпти, деган савол ҳам бор. Ғарб ва халқаро ташкилотлар ваҳший ҳайвонларни циркда ўйнатишга тақиқ қўйяпти. Бизнинг бир қарорга кела олмаётганимизнинг сабаби шундаки, Тошкент давлат циркининг ишлаш услуби фақат ҳайвонлар билан боғлиқ, жуда кам миқдорда гимнастика, акробатика томошалари қўйилади. Шунинг учун биз бир неча йилдан бери бу масаланинг ечимини топиш билан шуғулланяпмиз. Шахсан менинг фикримча, цирк биносини реконструкция қилиб, тўлиқ таъмирлаб ва ваҳший ҳайвонлардан аста-секин чиқиб кетишга жавоб берадиган бир механизмни ишлаб чиқиш керак. Келгусида унинг функцияларини мутлақ ўзгартириб, бугунги цирк қандай бўлса, ана шу ҳолатга олиб келиб, хусусий бошқарувга бериш керак. Цирк давлатга қарашли бўлиб турса, тураверади, циркнинг бирини икки қилиш жуда қийин. Ҳозир айтаётганларим — мен уч, тўрт йилдан бери курашаётган масалалар. Бунинг ечими шу, бошқа йўли йўқ», — деди ҳукумат вакили.
«Ўзбекистонда маданият соҳасида ҳали хусусийлаштириш бошланмаган. Бутун дунёни, ривожланган давлатларни бир кўринглар, кўп мамлакатларда маданий ишларни хусусий сектор амалга оширяпти. Натижада ривожланяпти, шу билан бирга рақобат ҳам бўляпти», — дея қўшимча қилди Назарбеков.
Маданият вазири Тошкент давлат цирки биносини таъмирлаш ишлари нега чўзилаётгани ҳақида ҳам гапирди.
«Бизга кўп таклифлар бўляпти, лойиҳалар ишлаб чиқиляпти ва қаеригадир келганда, ишламайдиган нуқтаси чиқиб қоляпти ва натижада у лойиҳадан воз кечиляпти. Кейин бошқа бир лойиҳа устида ишланяпти. Ҳозир дунёда циркнинг функциялари ўзгаряпти. Циркнинг 20 йил олдинги функцияси билан бугунги функцияси бутунлай фарқ қилади. Агар биз ҳозир цирк биносини таъмирласак, 20 йил аввалги мезон билан таъмирлаймиз. Шундай қиладиган бўлсак, бир неча йилдан кейин бундай фаолият юритманглар, ҳайвонларни циркдан чиқариб юборинглар, деган талаб келиб тушади. Беш йилдан кейин циркда ҳайвонлар умуман бўлмасин дейилган тақдирда ҳам, ҳайвонларсиз бемалол фаолият юритадиган цирк бўлиши керак. Унинг аналоги ҳали сизда ҳам, менда ҳам йўқ, ҳеч кимда йўқ. Бу масалада етти ўлчаб, бир кесишимиз керак. Чунки ҳозир цирк биносининг таъмири учун жуда катта миқдорда маблағ сарфласак, беш йилдан кейин бундай цирк ишламайди, фаолиятини тўхтатинглар, дейишади, шунча пул сарфлаганимиз қолади, холос. Шошилмаётганимизнинг сабаби фақат шу, аниқ бир қарорга келгунча шошилмаяпмиз», — деди Озодбек Назарбеков.
Эслатиб ўтамиз, 2024 йил бошида Ўзбекистон президентига Тошкент давлат цирки бўйича лойиҳа тақдим қилинган ва цирк биносини реконструкция қилиш, шунингдек, таълим ва амалиётни уйғунлаштириш мақсадида 300 ўринли ўқув биносини қуриш (қиймати 15 миллиард сўм) режалари муҳокама этилган.
2019−2020 йилларда Тошкент циркида капитал реконструкция ишлари амалга оширилганди. Ўшанда реконструкция бюджети 46,63 миллиард сўмга баҳоланган.
