Буюк Британия Ички ишлар вазирлиги ҳукуматнинг янги режаларига мувофиқ, аёлларга нисбатан ўтакетган нафратни экстремизм шакли сифатида кўриб чиқишини маълум қилди, деб хабар бермоқда BBC News.
Ички ишлар вазири Иветт Купер мамлакатнинг экстремизмга қарши кураш бўйича амалдаги стратегиясини қайта кўриб чиқиш ва хавфли мафкуралардан келиб чиқувчи таҳдидларга қарши қандай яхшироқ курашиш кераклигини аниқлаш бўйича кўрсатма берди.
Ҳукуматнинг фикрича, мафкуравий тенденциялардан бири сифатида аёлларга нисбатан нафрат кучайиб бормоқда. Купернинг айтишича, Британия демократиясининг асосини емирувчи экстремизм кучайиши ҳам интернетда, ҳам кўчаларда кузатилмоқда.
Жорий стратегиянинг тўлиқ таҳлили октябрь ойигача тайёр бўлиши кутилмоқда. У, шунингдек, ёшларнинг радикаллашув сабабларини ҳам ўрганади. BBC нашрининг хабар беришича, таҳлил натижалари Лейбористлар партияси ўз сайловолди дастурида ваъда қилган янги стратегияга асос бўлади.
Мизогиния — аёлларга нисбатан уларнинг жинсидан келиб чиққан ҳолда кўрсатиладиган салбий муносабат. Бу турли шаклларда намоён бўлиши мумкин: менсимаслик ва камситишдан тортиб зўравонликкача. Оддий қилиб айтганда, мизогиния — аёллардан шунчаки улар аёл бўлгани учун нафратланиш ёки ёқтирмасликдир.
- Август ойи бошида Британия шаҳарларида муҳожирларга қарши норозилик намойишлари ва тартибсизликлар содир бўлди. Бу воқеалар Саутпортдаги болалар рақс студиясига қилинган ҳужум оқибатида 3 нафар қизнинг ҳалок бўлишидан сўнг бошланди. Полиция юздан ортиқ кишини қамоққа олди. Мамлакат бош вазири Кир Стармер бу тартибсизликларни «ўта ўнг йўналишдаги жинояткорлик» деб баҳолади.
