АҚШ президенти Жо Байден Демократик партиянинг миллий қурултойида хайрлашув нутқи билан чиқиб, президентлик фаолиятини сарҳисоб қилди ва Демократик партиядан президентликка номзод Камала Ҳаррисни қўллаб-қувватлади. Унинг нутқини ўз тарафдорлари билан сиёсий видолашув деб аташ мумкин, деб ёзади New York Times ва СNN.

Байден йиғилишга оиласи билан келди ва саҳнага рафиқаси Жилл ва қизи Эшлини таништирганидан кейин чиқди. У олқишлар билан кутиб олинди, жамоат эса «Биз Жони яхши кўрамиз!» ва «Раҳмат, Жо» дея бақирди.

Президентга олқишларни унинг президентлик пойгасидан чиқиш қарори учун миннатдорлик белгиси сифатида ҳам, 1972 йилда 29 ёшида Конгрессга биринчи марта сайланганида бошланган бой сиёсий карьерасига ҳурмат сифатида ҳам кўриш мумкин, қайд этади BBC.

Ўз нутқида Байден 2017 йилда Шарлоттсвиллда юз берган ўта ўнг ғалаёнлардан сўнг — «нафратнинг хавфсиз бандаргоҳи йўқлигини» таъминлаш ва «Америка умуртқа суягини тиклаш» учун — 2020 йилда Дональд Трампга қарши номзодини қўйиш қарорини эслади ва мамлакат бошқарувидаги тўрт йиллигини сарҳисоб қилди.

"Газета.uz"да реклама

«Ёз келди, қиш ўтди ва шу август оқшомида мен сизнинг олдингизда туриб, демократия ғалаба қозонганини, демократия ўз самарасини берганини ва энди демократияни сақлаб қолиш кераклигини айтмоқчиман», — деди Байден АҚШда унинг инаугурацияси арафасида мавжуд бўлган инқирозни назарда тутиб.

Байден Трампни ҳам танқид қилиб, уни омадсиз ва ёлғончи деб атади. «Фақат ғалаба қозонганингиздагина мамлакатни севишингизни айта олмайсиз», — деди у собиқ президент сайловда Байденга ютқазганини тан олишдан бош тортганидан сўнг Трамп тарафдорларининг 2021 йил январь ойида Капитолийга бостириб киришга уринишига ишора қилиб.

«Ҳеч бир бош қўмондон диктаторга Трамп [Россия президенти Владимир] Путинга таъзим қилганидек таъзим қилмаслиги керак. Мен ҳеч қачон бундай қилмаганман ва сизга ваъда бераман, Камала Ҳаррис ҳам ҳеч қачон бундай қилмайди», — деди Байден. Унинг қўшимча қилишича, Трамп ўз лавозимини тарк этган вақтда «Америка биринчи ўринда» доктринаси туфайли «Европа ва НАТО парчаланиб кетган эди».

Ўз нутқи давомида Байден вице-президент Камала Ҳаррисга ҳурмат бажо келтирди. «Камалани танлаш [охирги сайловда] номзодимизга айланганимда қабул қилган биринчи қарорим бўлганди. Ва бу мен бутун фаолиятим давомида қилган энг яхши қарор… У қаттиққўл, тажрибали ва ниҳоятда ҳалол. Унинг ҳикояси ўзида энг яхши Америка тарихини ифодалайди (Ҳаррис АҚШ вице-президенти лавозимини эгаллаган биринчи қора танли аёл ва келиб чиқиши осиёлик илк сиёсатчи — таҳр.),» — деди у.

Байден, шунингдек, Ҳаррис вице-президентликка танлаган Тим Уолцни ҳам қўллади.

«Биз демократиямизни сақлаб қолишимиз керак. 2024 йилда овоз беришингиз керак. Сенатни (ҳозирда демократлар назорат қилади — таҳр.) сақлаб қолишингиз керак. Вакиллар палатасини қайтариб олишингиз керак. Ва энг муҳими, сиз Дональд Трампни мағлуб этишингиз ва Камала ва Тимни Америка Қўшма Штатлари президенти ва вице-президенти этиб сайлашингиз керак», — деди у.

Нутқи сўнгида Байден «Америка мадҳияси» қўшиғидан иқтибос келтирди: «Асрлар давомидаги меҳнат ва ибодат бизни шу кунга етказди. Бизнинг меросимиз нима бўлади? Фарзандларимиз нима дейди? Кунларим тугаганда юрагим билишига имкон беринг. Америка, Америка, мен сен учун ҳаммасини қилдим».

  • АҚШда президентлик сайловлари 5 ноябрь куни бўлиб ўтади. Байден 21 июль куни партия аъзоларининг номзодликдан воз кечиш ҳақидаги чақириқлари фонида сайлов пойгасидан чиқиш қарорини эълон қилганди. Дональд Трамп билан муваффақиятсиз дебатдан кейин Байденга босим кучайганди. У демократлардан номзод сифатида Камала Ҳаррисни кўрсатишни таклиф қилган.
  • Демократик партиянинг тўрт кунлик қурултойи 19 август куни Чикагода очилди. Кейинги кунларда партиянинг таниқли вакиллари, жумладан, собиқ президентлар Билл Клинтон ва Барак Обама ҳам тадбирда сўзга чиқади. Ҳаррис пайшанба куни партия номзодлигини расман қабул қилиши кутилмоқда.