Шавкат Мирзиёев тадбиркорлар билан очиқ мулоқот чоғида бизнес учун қўшимча шарт-шароитлар яратиш бўйича янги ташаббусларни илгари сурди.
Кичик ва ўрта бизнесни қўллаб-қувватлаш
Биринчи йўналиш — кичик ва ўрта бизнес учун молиявий ресурсларни кўпайтириш.
Йил бошидан Бизнесни ривожлантириш банки ва Тадбиркорликни ривожлантириш компанияси ташкил этилиб, 35 мингдан ортиқ тадбиркорга 3,5 триллион сўм микрокредитлар ажратилди.
Бундан ташқари, «Бизнесга биринчи қадам» дастури бўйича тадбиркорликни энди бошлаётган 115 минг аҳолига 1 триллион сўмлик микроқарзлар берилди.
Президентнинг сўзларига кўра, бу тажрибани янада кенгайтиришга қарор қилинган. Эндиликда барча банклар ва микромолия ташкилотлари кичик ва ўрта бизнесни қўллаб-қувватлашда иштирок этишлари мумкин бўлади.
Масалан, 100 миллион сўмгача бўлган микрокредит тадбиркорларнинг бор-йўғи 9 фоизининг эҳтиёжига етарли экани маълум бўлди. Шундай қилиб, микрокредитлар миқдори 3 баробарга оширилиб, 300 миллион сўмга етказилади. Шу билан бирга, кредитнинг 100 миллион сўмгача бўлган қисми учун гаров талаб қилинмайди. Бу мақсадлар учун йилига 10 триллион сўм йўналтирилади.
Эндиликда ҳар бир ҳудудда Тадбиркорликни ривожлантириш компанияси филиали ташкил этилиб, салоҳиятли тадбиркорларни аниқлайди. Компания яхши кредит тарихи ва юқори барқарорлик рейтингига эга бўлган тадбиркорларга кафолатлар беради.
Микромолия
Микромолия бозори учун ҳам йўл «очилади». Масалан, ўтган етти ойда 91 та микромолия ташкилоти томонидан 6,6 триллион сўмлик молиявий хизматлар кўрсатилган бўлса, йил якунига қадар бу кўрсаткич 12 триллион сўмга етиши кутилмоқда.
Микромолиявий хизматларни давлат томонидан қўллаб-қувватлаш давом эттирилади. Уларга жорий йилдаги 1 триллион 600 миллиард сўмга қўшимча 1 триллион сўм маблағ ажратилади.
Бундан ташқари, устав капитали камида 50 миллиард сўм бўлган микромолиявий банкларни ташкил этишга рухсат берилади. Ушбу банклар кредит портфелининг камида 70 фоизи кичик ва ўрта бизнесни молиялаштиришга йўналтирилади.
Шунингдек, микромолия ташкилотларига тадбиркорларга хорижий валютада хизмат кўрсатиш ва лицензия асосида тўлов ташкилоти сифатида фаолият кўрсатишга рухсат берилади.
Факторинг
Бугунги кунда кўп экспортчилар йирик хорижий савдо тармоқларига 3−4 ой кечиктириб тўлаш шарти билан маҳсулот етказиб бермоқда.
Узлуксиз ишлаб чиқариш учун корхоналарда айланмага эҳтиёж ошаяпти. Лекин ҳамма тадбиркорда ҳам янги кредит олиш, унга гаров топиш имконияти йўқ.
Ушбу мақсадлар учун факторинг тадбиркордан гаров талаб қилмайдиган энг қулай восита ҳисобланади. Халқаро молия корпорацияси маълумотларига кўра, Ўзбекистонда факторинг хизматларига талаб 10 миллиард долларни ташкил этади. Ҳозирда бу хизмат фақат банклар ва микромолия ташкилотлари томонидан тақдим этилади.
Эндиликда алоҳида факторинг ташкилотини ташкил этишга рухсат берилди, агар мижознинг контрагенти Ўзбекистон норезиденти бўлса, хорижий валютада операцияларни амалга оширишга рухсат берилади. Факторинг хизматлари учун электрон платформа ҳам яратилади.
Қайд этилганидек, факторингни оммалаштириш туфайли тадбиркорлар айланмасидан 20 триллион сўм, экспорт қилувчи корхоналар эса 1 миллиард доллар олади.
Исломий молия
Сўров давомида тадбиркорларнинг 38 фоизи ислом молиясига асосланган ресурсларни олиш истагини билдирган.
Ўтган ойда микромолия ташкилотларига бундай хизматлар кўрсатишга рухсат берилди.
Тайёрланган янги қонун лойиҳаси қабул қилинса, банклар исломий молия билан ишлашлари мумкин бўлади. Бу янги молиявий хизматлар жорий этилишини, кўплаб инвесторларнинг келишини ва 5 миллиард долларлик қўшимча ресурс яратилишини рағбатлантиради, деди президент.
