Газ ресурслари улгуржи савдоси билан шуғулланувчи Ultimo Group Limited МЧЖнинг 50 фоизлик улушига эгалик қилувчи тадбиркор ва мазкур компания директори Туҳфатхўжа Анвархўжаев 2024 йил апрель ойида эълон қилинган материаллар сабаб «Озодлик» радиосининг ўзбек таҳририяти ҳамда унинг журналисти Лазизхон Олимов (Азиз Нур) устидан судга даъво аризаси киритганди.
Иш фуқаролик ишлари бўйича Шайхонтоҳур туманлараро судида судья А. Ражабов раислигида кўриб чиқилди. 12 июль куни бўлиб ўтган очиқ суд мажлисида даъвогар Туҳфатхўжа Анвархўжаевнинг адвокати Давронбек Ахматов, учинчи шахс сифатида жалб қилинган «Ўзтрансгаз» АЖнинг икки нафар ходими иштирок этганди. Биринчи суд мажлиси ҳақида ушбу мақола орқали танишиш мумкин.
19 июль куни ўтказилган навбатдаги суд мажлисида «Ўзтрансгаз» компанияси вакиллари сўзга чиқиб, Ultimo Group Limited Туркманистон газини «Қизилқумсемент» компаниясига сотганлигини тасдиқладилар. Етказиб бериш учун «Ўзтрансгаз»нинг магистраль газ қувурлари инфратузилмасидан фойдаланилган бўлиб, у билан «фақатгина ташиш шартномаси» имзолангани қайд этилди.
Газ-транспорт компанияси вакилининг айтишича, «Ўзтрансгаз» табиий монополия субъекти ҳисобланади, шунинг учун «газни ташиш бўйича шартнома тузишни рад этиш мумкин эмас, лекин технологик имкониятларни ҳисобга олиш керак».
Унинг сўзларига кўра, ташиш тарифлари бош вазир ўринбосари Жамшид Қўчқоров раислигида Вазирлар Маҳкамаси ҳузуридаги Ҳукуматлараро тариф комиссияси томонидан тасдиқланади.
Шунингдек, у 2021 йилнинг куз-қиш мавсумида кўплаб саноат корхоналарининг ишга туширилиши ва «сўнгги йилларда қурилиш ҳажмининг 30−40 фоизга ошиши» фонида газ танқислиги юзага келганини маълум қилди. «Ўзтрансгаз» вакилининг айтишича, қишда цемент заводлари газ етишмаслиги сабабли тўхтаб қолган, бироқ «Қизилқумсемент»нинг Tashkent City лойиҳаси ташаббускорлари олдидаги мажбуриятлари бор эди, уни амалга ошириш учун хомашё керак бўлган. Таъминот узилган тақдирда жарима назарда тутилган.
Унинг эслатишича, «Қизилқумсемент» Ultimo Group Limited компаниясидан газни 1000 сўмдан сотиб олган — худди шундай тариф учинчи тоифадаги истеъмолчилар учун ҳам амал қилган.
Мутахассис, шунингдек, «Ўзтрансгаз» Ultimo Group Limitedъга газ импорти учун тўламаганини таъкидлади.
29 июль куни бўлиб ўтган якуний йиғилишда тилшунос мутахассислар, филология, адабиёт ва ўзбек тили фанлари магистранти ва докторантлари иштирок этиб, терговда билдирилган фикрларга баҳо бердилар.
Улар «арвоҳ» «ўртакаш» «яширин фаолият» ва бошқа сўзларни ҳамда контекстни баҳоладилар. Даъвогар томон, шунингдек, Тошкент давлат ўзбек тили ва адабиёти университети ҳузуридаги Давлат тилида иш юритиш асосларини ўқитиш ва малака ошириш марказидан хулоса олиб, компаниянинг ишчанлик обрўсига, таъсисчининг шаъни ва қадр-қимматига салбий таъсир кўрсатаётган юқоридаги ва бошқа эпизодларни ҳам кўрсатиб ўтди.
Мажлис якунида Абдуқодир Ражабов раислигидаги суд Ultimo Group Limited ва Туҳафтхўжа Анвархўжаевнинг даъвосини қаноатлантириш тўғрисида қарор қабул қилди ва «Озодлик» радиосига раддия эълон қилиб, маънавий зарар учун 100 млн сўм компенсация тўлашни юклади.
Маълумот учун, Ultimo Group Limited компанияси 2021 йилнинг 10 мартида ташкил этилган бўлиб, орадан бир ой ўтиб, «Қизилқумцемент» билан 315 миллиард сўмлик (30 миллион долларга яқин) шартнома имзолаган.
