Жиззах вилояти Зомин туманидаги деҳқон хўжалиги электр энергиясидан ноқонуний фойдалангани аниқланди, деб хабар берди Бош прокуратура матбуот хизмати.
Қишлоқ ҳўжалик экинларини сув насослари билан суғоришда энергия ресурсларидан ноқонуний фойдаланиш ҳолатларини аниқлашга қаратилган назорат тадбирлари давомида «С.Р.» фермер хўжалиги раҳбари Х.Н. ушланди. Аниқланишича, у сув насосини тармоққа улаган, ўрнатилган ҳисобга олиш ускунасига уланиш схемаларини ўзгартириш йўли билан ташқи таъсир кўрсатган.
Х.Н. бу орқали 1 миллиард 395 миллион сўмлик 622,6 минг кВт соат электр энергиясини ўғирлаган.
Унга нисбатан Жиноят кодексининг 169-моддаси 4-қисми «а» банди (Жуда кўп миқдорда ўғрилик) билан жиноят иши қўзғатилди, гумонланувчи процессуал тартибда ушланди.
БП фермер ва деҳқонлардан фаолияти давомида энергия ресурсларидан қонуний тартибда ва оқилона фойдаланишни сўради. Ташкилот кучайтирилган рейд тадбирлари давом этаётгани ва жазо муқаррарлигини эслатди.
