АҚШ Демократик партияси делегатлари бўлажак сайловларда вице-президент Камала Ҳаррисни ўз номзоди сифатида расман маъқуллади. Овоз бериш 20 август куни Чикагодаги партиянинг миллий қурултойида бўлиб ўтди, деб хабар бермоқда CNN.

Ҳаррис Висконсин штатидан видеоалоқа орқали маросимга қўшилди, у ерда у сайловолди митингини ўтказиб, рамзий равишда номзодликни қабул қилди.

«Сизларнинг номзодингиз бўлиш биз учун катта шараф, — деди Ҳаррис. — Бу кампания одамлар фикрига асосланган ва биз биргаликда олдинга силжишнинг янги йўлини белгилаймиз».

"Газета.uz"да реклама

Аввалроқ Ҳаррис 1−5 август кунлари бўлиб ўтган виртуал овоз бериш жараёнида делегатларнинг 99 фоиз овозини қўлга киритиб, партиядан президентликка расман номзод бўлганди.

Ҳаррис Американинг иккита йирик партиясидан бирида президентликка номзодликни қўлга киритган биринчи қора танли аёл ва жанубий осиёлик биринчи аёл бўлди. У Миннесота губернатори Тим Уолцни ўзининг шериги сифатида танлади, агар Ҳаррис сайловда ғалаба қозонса, Уолц вице-президент бўлади.

Ҳаррис 22 август куни қурултойнинг охирги кунида президентликка номзодликни расман қабул қилиши кутилмоқда. У ерда ҳам нутқ сўзланади.

  • АҚШда президентлик сайловлари 5 ноябрь куни бўлиб ўтади. Байден 21 июль куни партия аъзоларининг номзодликдан воз кечиш ҳақидаги чақириқлари фонида сайлов пойгасидан чиқиш қарорини эълон қилди. Республикачи номзод Дональд Трамп билан муваффақиятсиз дебатдан кейин Байденга босим кучайди. У Демократик номзод сифатида Камала Ҳаррисни кўрсатишни таклиф қилди.
  • Чикагода 19 август куни демократлар съезди очилди. Тўрт кун давомида унда партиянинг таниқли вакиллари, жумладан, собиқ президентлар Билл Клинтон ва Барак Обама сўзга чиқади.
  • АҚШ президенти Жо Байден съезднинг биринчи кунида делегатлар билан хайрлашув нутқини сўзлади. У ўз президентлиги якунларини сарҳисоб қилди ва Камала Ҳаррисни қўллаб-қувватлади. У ўз нутқини: «Америка, мен сен учун ҳамма нарсани қилдим», деган жумла билан якунлади.