Марказий сайлов комиссияси Ўзбекистондаги 5 та сиёсий партияга Олий Мажлис Қонунчилик палатаси ва маҳаллий кенгашлар депутатлар сайловида қатнашиш учун рухсат берди.
Комиссия йиғилишича қайд этилишича, барча партиялар сайловда иштирок этиш учун керак бўлган 40 мингта ҳақиқий овозни тўплаган.
Сайлов кодексининг 69-моддасига мувофиқ сайловда иштирок этувчи партиялар рўйхати аризаларнинг келиб тушиши навбати тартибида марказий матбуотда эълон қилинади. Шунга кўра, сиёсий партиялардан ҳужжатларнинг келиб тушиши навбатига асосан қуйидаги кетма-кетликда сиёсий партиялар Олий Мажлис Қонунчилик палатаси ва маҳаллий Кенгашлар депутатлари сайловида иштирок этишга ижозат бериш тўғрисида қарор қабул қилинди:
- биринчи, Тадбиркорлар ва ишбилармонлар ҳаракати — Ўзбекистон Либерал-демократик партиясига;
- иккинчи, Ўзбекистон «Миллий тикланиш» демократик партиясига;
- учинчи, Ўзбекистон Экологик партиясига;
- тўртинчи, Ўзбекистон Халқ демократик партиясига;
- бешинчи, Ўзбекистон «Адолат» социал демократик партиясига.
Сайлов кодексининг 31-моддасига асосан Қонунчилик палатаси депутатларининг ягона сайлов округи бўйича сайловида сайлов бюллетенига унда иштирок этаётган сиёсий партияларнинг номи, рамзий белгиси уларнинг сайловда иштирок этиши учун ижозат берилган навбатига мувофиқ кетма-кетликда киритилади.
Эслатиб ўтамиз, Ўзбекистонда навбатдаги Қонунчилик палатаси ва маҳаллий кенгашлар депутатлар сайлови 2024 йил 27 октябрда ўтказилади.
