Дунёдаги энг йирик уяли алоқа операторларидан бири Британиянинг Vodafone компанияси Ўзбекистон бозорига киришни режалаштирмоқда. Бу ҳақда 20 август куни Нукусда президент билан бўлиб ўтган йиғилишда UzTex Group тўқимачилик компанияси таъсисчиси, InfinBank`нинг асосий акциядори ва бошқа тадбиркорлик субъектлари эгаси Фарҳод Мамажонов маълум қилди.
«Биз янги соҳага қўл урдик. Ўзингиз кеча мажлисда рақамлаштириш ҳақида гапирдингиз. Яшин тезлигида ишлаш учун бизга яшин [тезлигида] интернет керак. Ўтган йили чет эл брендини олиб киргин, деб топшириқ бергандингиз. Биз Ўзбекистонга жуда ҳам яққол бўлган Британиянинг Vodafone бренди мобиль алоқасини ишга тушириш бўйича 5G Standalone билан иш бошладик», — деди у.
«Ҳамкоримиз Британиянинг Vodafone бренди бўлади. Биз Perfectum корхонасини хусусийлаштириб олдик…Хусусий тадбиркорга рақамлаштириш қуйи бўғинда етиб бориши учун интернет керак бўлди, буни банк орасида кўриб чиқдик. Бунинг учун Uzcard компанияси билан ҳамкорликда инқилобий режага қўл урдик — Vodafone компанияси ташкил этилади. Худо хоҳласа, янги йилда ишга тушади», — деди тадбиркор.
Vodafone Group Plc қирқ йиллик тарихга эга ва 30 мамлакатда 434 млн фойдаланувчи (дунёдаChina Mobile`дан кейин иккинчи кўрсаткич) бўлган дунёдаги энг йирик телекоммуникация компаниялари гуруҳларидан бири ҳисобланади. Яна 50 та давлатда у тўлиқ назоратга эга бўлмаган тармоқнинг ҳамкори ҳисобланади. У овозли, хабар алмашиш, маълумотлар ва стационар алоқа каби кенг кўламли хизматларни тақдим этади. Шунингдек, компания Freedom Telecom билан ҳамкорликда Қозоғистон бозорига чиқишни режалаштирган.
Фарҳод Мамажонов инвестиция қиймати 250 млн еврони ташкил этишини айтди. Лойиҳа 2025 йилнинг биринчи чорагида бошланиши ва 1000 та иш ўрни яратилиши кутилмоқда. Лойиҳада ўз жиҳозлари билан Финляндиянинг Nokia компанияси ҳам иштирок этади.
«Ушбу технологиялар ишга қўйиш учун олиб келиняпти, ўрнатиш ишлари олиб бориляпти. Бу лойиҳани амалга ошириш учун „Ўзсаноатқурилишбанк“ орқали Финляндия экспорт агентлигидан 100 млн евро инвестиция жалб қилдик. Таъсисчилар — ўзимиз 150 млн евро жалб қиляпмиз… Шу пайтгача хорижий ва давлат [мобиль] корхоналари бўлган, ҳозир эса миллий уяли алоқа операторини ташкил қиляпмиз», — деди у.
Тадбиркорнинг айтишича, Vodafone бозорга киришдан олдин «Ўзбекистондаги иқтисодий ва сиёсий ўзгаришларни синчиклаб текширган». БАА технологик гуруҳи — Emirates Telecommunications Group Company PJSC (e& — Etisalat and) ҳам лойиҳада техник ҳамкор сифатида иштирок этади, деди у.
2023 йилнинг октябрь ойида Perfectum дунёдаги етакчи мобил алоқа тизимлари яратувчиларидан ва ишлаб чиқарувчиларидан бири Nokia компанияси иштирокида 5G New Radio технологиясини жорий этишга қарор қилгани ҳақида хабар берган.
Март ойида Perfectum уяли алоқа оператори тўлиқ хусусийлаштирилиб, янги эгасига ўтгани маълум бўлган. Операторнинг юридик шахси — Rubicon Wireless Communication МЧЖ ҳозирда 100 фоиз тадбиркор Абдумалик Валиджанович Иминовга тегишли. Компания раҳбари эса Дмитрий Шуков бўлди.
2020 йилда давлат Perfectum`даги давлат улушини хусусийлаштириш режаларини эълон қилганди. Ўша пайтда компаниянинг 65 фоизи давлатга тегишли бўлган, қолган қисми Amis Protrade International`га тегишли эди. Perfectum акцияларини сотиш ҳақидаги хабарлар очиқ манбаларда чоп этилмаган.
2024 йилнинг июнь ойида Perfectum Ўзбекистон телекоммуникация экотизимини рақамлаштириш ва трансформация қилиш мақсадида БААнинг e& Group (Etisalat and) компанияси билан ҳамкорлик шартномасини тузди. Ушбу ҳамкорликнинг бир қисми сифатида компания 5G Standalone New Radio (5G SA NR) технологиясига асосланган янги Perfectum инфратузилмасини яратишда ёрдам беради.
Бугунги кунда Ўзбекистонда бешта GSM уяли алоқа оператори: Mobiuz, Beeline, Humans, Uzmobile ва Ucell фаолият кўрсатмоқда. Кўп йиллар давомида Perfectum CDMA стандартидаги уяли алоқа хизматларини тақдим этган. Ўзбекистондаги уяли алоқа операторларининг радиочастоталари давлат комиссияси томонидан стандартлаштирилади ва тарқатилади.
