2024 йил июль ойида Ўзбекистоннинг йирик корхоналарида газ қазиб олиш 3,79 миллиард куб метргача камайди, дейилади Статистика агентлигининг «Газета.uz» ўрганган саноат ишлаб чиқаришига доир ҳисоботида.
Бу 2023 йил июлига (3,9 миллиард) нисбатан 2,9 фоизга (114,6 миллион куб метр), 2022 йил июль ойига (4,26 миллиард) нисбатан эса 11 фоизга кам.
Етти ойда ишлаб чиқариш ҳажми 26,15 миллиард куб метрни ташкил этди, бу ўтган йилнинг шу даврига нисбатан 4,8 фоизга ёки 1,3 миллиард куб метрга камроқ.
2024 йил ва аввалги йилларнинг январь-июль ойлари учун кўмир, нефт, газ ва газ конденсати ишлаб чиқариш кўрсаткичлари таққоси.
Май ойида Энергетика вазирлиги сўнгги қарийб тўрт йил ичида ишлаб чиқаришнинг рекорд даражада пасайишини Қандим газни қайта ишлаш заводи, Жарқудуқ газни комплекс тайёрлаш қурилмасидаги режалаштирилган таъмирлаш ишлари ва бошқа технологик сабаблар билан изоҳлаган эди. Шу билан бирга, газ қазиб олишнинг пасайиши бир неча йиллардан бери давом этмоқда.
Эслатиб ўтамиз, Ўзбекистонда электр энергиясининг 75−80 фоизи газ ёқиш ҳисобига ишлаб чиқарилади.
Катта қисми газда ишлайдиган (қуёш ва шамол станцияларидан ташқари) йирик энергия таъминоти корхоналари томонидан электр энергияси ишлаб чиқариш июль ойида 5,96 миллиард кВт/соатгача камайди, бу ўтган йилнинг июлига (7,2 миллиард) нисбатан 1,2 миллиард киловатт/соатга (-17 фоизга) камдир.
Январь-июль ойларида ишлаб чиқариш 42,8 миллиард кВт/соатгача камайган, бу 2023 йилнинг етти ойлик кўрсаткичидан 5,4 фоизга ёки 2,46 миллиард кВт/соатга кам.
2024 йил ва аввалги йиллар январь-июль ойларидаги электр ва иссиқлик энергияси ишлаб чиқариш кўрсаткичлари таққоси.
Аввалроқ Энергетика вазирлиги Статистика агентлигининг май ойида электр ишлаб чиқариш камайиши бўйича маълумотларини изоҳлаб, қуёш ва шамол электростанциялари ҳисобига электр ишлаб чиқаришнинг ўсиши 5,8 фоизни ташкил этганини билдирганди. Таъминот камайиши тарифлар ошганидан кейинги «тежамкорлик» билан изоҳланган.
Бироқ Энергетика вазирлиги мунтазам равишда ҳар ойлик/кунлик ҳисобда станциялар бўйича ишлаб чиқариш маълумотларини эълон қилмаяпти.
Ойлик нефть қазиб олиш 60,2 минг тоннани ташкил этди (2023 йил июлига нисбатан -7 фоиз ёки минус 4500 тонна). Етти ой давомида ишлаб чиқариш 424,8 минг тоннани ташкил этди (ўтган йилнинг шу даврига нисбатан -6,8 фоиз).
Июль ойида 115 минг тонна автомобиль бензини ишлаб чиқарилди, бу 2023 йил июлига нисбатан 13,7 фоизга кам (133,2 минг). Етти ойлик таққослашда ўсиш атиги 0,7 фоизни ташкил этди — 784,1 минг тоннадан 789,5 минг тоннагача.
Ўтган ойда дизель ёнилғиси ишлаб чиқариш 90,4 дан 119,4 минг тоннагача ошган (ўтган йилнинг июлига нисбатан +32,1%). Бироқ 2023 йилнинг январь-июль ойлари билан солиштирганда (бир йил ичида) бу кўрсаткич 1,7 фоизга — 629,8 минг тоннадан 619 минг тоннагача камайган.
Ойлик кўмир қазиб олиш рекорд даражада 844,7 минг тоннага (+236,4 минг) ўсди, бу ўтган йилнинг июль ойидаги ҳажмдан қарийб 1,4 баробар кўп. Январь-июль ойларида ишлаб чиқариш 12,4 фоизга ошиб, 3,48 миллион тоннани ташкил этди.
2023 йилда Ўзбекистон экспорт қилганидан кўпроқ газ импорт қилди. Етказиб беришдаги фарқ 165 миллион доллардан ошди, деб ёзганди «Газета.uz».
Шунингдек, Ўзбекистон ва Россия газ ва электр энергиясини сезиларли даражада ошириш бўйича музокаралар олиб бораётгани ҳақида хабар берган эдик.
