Афғонистондаги «Толибон» ҳукумати аёлларнинг жамоат олдида юзи очиқ ҳолда гапиришини ва кўринишини тақиқлади, дея хабар бермоқда Associated Press тегишли қонунларга таяниб.
Тақиқлар 2021 йилда ҳокимиятни қўлга киритгандан сўнг «Толибон» томонидан яратилган Фазилатларни тарғиб қилиш ва иллатларнинг олдини олиш вазирлиги томонидан чиқарилди. Улар кундалик ҳаётнинг жамоат транспорти, мусиқа, соқол олиш ва байрамлар каби жиҳатларини қамраб олади.
Тақиқлар Афғонистондаги биринчи расмий декларацияга киритилди ва 114 саҳифа ва 35 моддадан иборат ҳужжатда баён этилди.
«Биз сизни ишонтириб айтамизки, бу исломий қонун фазилатларни тарғиб қилиш ва иллатларни йўқ қилишда катта ёрдам беради», — деди вазирлик вакили Маулви Абдул Ғафар Фарук.
Декларациянинг 13-моддасида мамлакат аёллари ҳар доим жамоат жойларида баданларини ёпиб юришлари шартлиги, «васвасага тушмаслик ва бошқаларни ҳам васвасага солмаслик» учун юзларини ёпиши зарурлиги қайд этилган. Кийим, қонунга кўра, юпқа, тор ёки қисқа бўлмаслиги керак.
Тақиққа кўра, аёлнинг овози интим нарса ҳисобланади, шунинг учун у жамоат жойларида қўшиқ айтмаслиги, хитоб қилмаслиги ва овоз чиқариб ўқимаслиги керак. Шунингдек, аёлларнинг маҳрам бўлмаган эркакларга қараши тақиқланади.
17-модда тирик мавжудотлар тасвирларини чоп этишни тақиқлайди, бу эса аллақачон мўрт афғон медиа маконига таҳдид солади, деб таъкидлайди AP.
19-модда мусиқа чалишни, ёлғиз аёлларни ташишни ва қариндоши бўлмаган эркаклар ва аёллар мулоқотини тақиқлайди.
- Афғон аёлларининг юзлари очиқ ҳолда кўчага чиқишига тақиқ 2022 йилнинг май ойидан бошлаб амал қилади. 1996 йилдан 2001 йилгача «Толибон» ҳукмронлиги даврида кўчаларда ҳижоб ўраш ҳам мажбурий эди.
- Ўша йилнинг декабрь ойида Афғонистон Олий таълим вазирлиги талаба қизларнинг олий ўқув юртларида қатнашишини тўхтатиб қўйишни буюрган. 2023 йил июль ойида «Толибон» раҳбарияти мамлакатдаги барча аёллар гўзаллик салонларини ёпишга кўрсатма берган.
- БМТнинг глобал таълим бўйича махсус вакили Гордон Браун Халқаро жиноий судни Афғонистондаги аёллар ва қизларни камситгани учун «Толибон»ни жиноий жавобгарликка тортишга чақирганди.
