Ўзбекистон миллий ахборот агентлиги (ЎзА) Собира Холдарова исмли сунъий интеллектга асосланган виртуаль сухандон ишга туширилганини маълум қилди.
У сўнгги янгиликларни тўққизта — ўзбек, инглиз, рус, француз, араб, хитой, немис, испан, қозоқ тилларида ўқиб беради.
Сунъий интеллект асосида сухандон яратиш учун журналист Дилдора Абдухалилованинг прототипидан фойдаланилган. Лойиҳа We Digital Agency томонидан ишлаб чиқилган.
«Мазкур мухбирга бежизга Собира Холдорова дея ном қўйилмади. Чунки Собира Холдорова Марказий Осиё ва Ўзбекистондаги биринчи профессионал аёл журналисти бўлган», — дейилади хабарда.
Собира Холдорова 1907 йилда Наманган вилоятининг Чуст шаҳрида камбағал деҳқон оиласида туғилган. 1923 йилда Тошкентга келиб, хотин-қизлар маориф институтида икки йил давомида таълим олган. Кейинчалик Москвадаги Олий журналистика институтида ўқиган.
Тошкентга қайтгач, бир қанча газета, журнал таҳририятларида ишлаган. 1937 йилда «буржуа элементлар билан алоқага йўл қўйган, огоҳликни йўқотган» деган айбловлар билан қамоққа олинган. 1940 йил 5 декабрь куни Якутияга 10 йилга сургун қилинган. Собира Холдорованинг турмуш ўртоғи Мўмин Усмонов эса 1938 йил 4 октябрда отиб ташланган. Сургун тўғрисидаги суд ҳукмидан сўнг фарзандлари Пўлат ва Манзура болалар уйига топширилган.
1955 йилда қамоқдан қайтган Собира Холдорова 1984 йилда вафот этган. Ўғли Пўлат Усмонов иккинчи жаҳон урушидан ярадор бўлиб қайтган. Қизи Манзура Усмонова — физика-математика фанлари доктори.
«Сунъий интеллект асосида яратилган мухбирга Собира Холдорова номини қўйишдан мақсад қатағон қурбони бўлган биринчи ўзбек аёл журналистининг ёрқин хотирасини тиклашдир», — дейилади хабарда.
ЎзА номидан тарқатилиши мумкин бўлган сохта видеороликлардан ҳимояланиш мақсадида ҳар бир видеога QR код киритилади, бу орқали ушбу видеонинг матнини агентлик сайтидан текшириш мумкин.
