Россия Ўзбекистонга маймунчечакни аниқлаш учун «Вектор» илмий маркази томонидан ишлаб чиқарилган тест тизимлари тўпламларини юборади. Бу ҳақда Россия Федерацияси истеъмолчилар ҳуқуқларини ҳимоя қилиш ва инсон фаровонлигини назорат қилиш федерал хизмати («Роспотребнадзор») матбуот хизмати хабар берди.
26 август куни «Роспотребнадзор» ташаббуси билан Евросиё иқтисодий иттифоқига (ЕОИИ) аъзо давлатлар аҳолисининг санитария-эпидемиология фаровонлиги соҳасидаги ваколатли органлар раҳбарлари кенгашининг навбатдан ташқари йиғилиши бўлиб ўтди.
Йиғилишда Арманистон, Беларусь, Қозоғистон ва Қирғизистон бош давлат санитария шифокорлари иштирок этди. Иштирок этиш учун Тожикистон ва Ўзбекистоннинг санитария-эпидемиология осойишталиги соҳасидаги ваколатли органлари раҳбарлари ҳам таклиф этилди.
Йиғилишда ЖССТнинг маймунчечак касаллиги бўйича халқаро фавқулодда ҳолат эълон қилиши билан боғлиқ вазият муҳокама қилинди. Кенгаш аъзоларининг сўзларига кўра, ЕОИИга аъзо давлатлар Тожикистон ва Ўзбекистонда маймунчечак касаллигининг тарқалиш хавфи паст деб баҳоланмоқда.
Евросиё минтақасининг барча мамлакатлари чегарада санитария ва карантин назорати чораларини кучайтирди.
«Ҳамкорлар Россия томонига «Роспотребнадзор»нинг «Вектор» илмий муассасаси томонидан ишлаб чиқилган маймунчечакни аниқлаш учун тест тизимларини тақдим этиш илтимоси билан мурожаат қилди. Тест тизимларининг биринчи тўпламлари шу ҳафта Ўзбекистонга етказилади», — дейилади хабарда.
Жаҳон соғлиқни сақлаш ташкилоти Африкадаги маймунчечак эпидемиясини глобал фавқулодда ҳолат деб эълон қилган.
Бу билан ЖССТ сўнгги икки йил ичида иккинчи бор маймунчечакни соғлиқни сақлаш бўйича фавқулодда ҳолат деб эълон қилди. Биринчи глобал эпидемия 2022−2023 йилларда қайд этилган, ўшанда унга IIb кладаси деб номланувчи штамм сабаб бўлган. Ҳозирги эпидемияни эса касалланганларнинг 10 фоизгача қисмининг ўлимига сабаб бўлаётган Ib кладаси штамми чақирган.
Янги эпидемия Конго Демократик Республикасида авж олиш билан бошланди, у ерда 450 киши ҳалок бўлди, кейин эса марказий ва шарқий Африкага тарқалди. ЖССТ раҳбари Адҳаном Гебрейесус касалланишлар сони жорий йилнинг биринчи ярмида ўтган йилдагидан ошиб кетганини маълум қилди ва у ЖССТ фавқулодда вазиятлар қўмитаси тавсиясига кўра, янги эпидемияни «халқаро аҳамиятга молик соғлиқни сақлаш фавқулодда вазияти» деб эълон қилмоқда.
Касаллик тарқалишининг олдини олиш учун қуйидагилар тавсия этилади:
- маймунчечак учун эпидемиологик жиҳатдан ноқулай бўлган мамлакатларга саёҳатни чеклаш;
- мажбурий саёҳатда ёввойи ҳайвонлар ва кемирувчилар (маймунлар, каламушлар) билан алоқа қилишдан сақланиш;
- жамоат жойларига ташриф буюрганда шахсий гигиена қоидаларига қатъий риоя қилиш;
- иситма ёки тери тошмаси бўлган йўловчилар билан саёҳат қилишда иложи борича санитария (ижтимоий) масофани сақлаш, тиббий ниқоблардан фойдаланиш ва қўлларни дезинфекциялаш воситалари билан парваришлаш;
- жамоат транспортида тиббий ниқоблардан фойдаланиш ва транспортдан чиққандан кейин қўлларни дезинфекциялаш воситалари билан парваришлаш.
Ўзбекистон аҳолисининг кўпчилиги, хусусан, 1980 йилгача туғилганлар маймунчечакка қарши иммунитетга эга, деб хабар қилди Санитария-эпидемиология қўмитаси.
«Маймунчечак касаллиги республикамиз ҳудудига кириб келиши эҳтимоли жуда кам. Негаки маймунчечак касаллиги қайд қилинаётган Европа мамлакатларида беморлар ва мулоқотда бўлганларга нисбатан алоҳидалаш чоралари олиб борилмоқда, эпидемияга қарши амалга оширилаётган чора-тадбирлар эса тўлиқ самара бермоқда», — дейилади хабарда.
Санитария-эпидемиология қўмитаси вакили Рустамжон Икромов билан маймунчечак касаллиги ҳақида суҳбат:
