Украина президенти Владимир Зеленский Киев Россия билан урушни тугатиш режасини аллақачон тайёрлаб қўйганини ва уни сентябрь ойида АҚШ президенти Жо Байденга тақдим этишини айтди. Бу ҳақда у «Украина 2024. Мустақиллик» форуми доирасидаги матбуот анжуманида маълум қилди.
Зеленскийнинг фикрича, режа бир неча банддан иборат. «Курск вилояти бизнинг режамизга — Украина учун ғалаба режасига киради. Баъзилар учун бу жуда амбицияли туюлиши мумкин, аммо биз учун бу муҳим режа», — деди у (иқтибос NV.ua'дан).
Зеленский режанинг иккинчи йўналишини «Украинани жаҳон хавфсизлик инфратузилмасидаги стратегик ўринда мустаҳкамлаш» деб атади, учинчиси — «Россияни урушни дипломатик йўл билан тугатишга мажбур қилиш», тўртинчиси эса — «иқтисодий».
«Режа тайёр. Мен бу режани биринчи бўлиб АҚШ президентига тақдим қилсам тўғри бўлади, деб ўйлайман. Ушбу режанинг муваффақияти унга боғлиқ — улар бизга ушбу режадаги нарсаларни берадими ёки йўқ, биз ушбу режада мавжуд бўлган нарсаларни ишлатишда эркин бўламизми ёки йўқ», — деди у.
«Менимча, бу режани ҳам Камала Ҳаррисга, ҳам Дональд Трампга етказиш тўғри бўлади, чунки биз ким президент бўлишини билмаймиз, лекин бу режани амалга оширишни жуда хоҳлаймиз», — дея қўшимча қилди Зеленский.
Байден, Ҳаррис ва Трамп билан учрашувлар Зеленскийнинг БМТ Бош ассамблеяси учун Нью-Йоркка сафари доирасида режалаштирилган, дея аниқлик киритмоқда «РБК-Украiна».
Шу матбуот анжуманида Владимир Зеленский мамлакат ҳудудларини хавфсизлик кафолатлари ва НАТО аъзолигига алмаштиришга тайёр эмаслигини, шунингдек, Украина Россия президенти Владимир Путин билан муроса қилмаслиги кераклигини айтди.
«Мен бутун дунё нимани эшитишни хоҳлаётганини тушунаман: Украина урушни эртага қандай тугатиш бўйича муросага келиш режасини ишлаб чиқди. Лекин мен сизни ажаблантирмайман. Путин билан бу муросага ўхшамайди, принципиал жиҳатдан бугунги мулоқот… бўш, маъносиз. У уруш дипломатик йўл билан тугашини истамайди. У гўёки дипломатик, лекин унга еримизнинг 30 фоизини беришимизни истайди. Ўйлайманки, биз бу борада у билан бирга ўйнамаслигимиз керак», — деди у.
