Тошкент шаҳрида «Миллий боғ» метро бекати иккинчи вестибюлини таъмирлаш ишлари бошланди. Интернетда қурилиш ишларининг фото ва видеолари пайдо бўлди.
Тошкент метрополитени матбуот хизматининг «Газета.uz»га маълум қилишича, бешта бекат — «Миллий боғ», «Машинасозлар», «Ўзбекистон», «Ғафур Ғулом» ва «Юнус Ражабий» станцияларининг иккинчи вестибюлини очиш режалаштирилмоқда.
Тошкент метроси матбуот хизматининг хабарига кўра, 2024 йил якунига қадар метродан фойдаланувчи йўловчилар сони 1 миллионга етиши кутилмоқда.
«Ушбу қурилиш ишларининг тугаш муддати хусусида эса қурилиш жараёнларининг техник ҳолатига кўра қўшимча маълумот тақдим этилади», — дейилади хабарда.
Июль ойи бошида метрополитен иккинчи вестибюли ишламайдиган бекатлар 30−40 йил аввал (2001 йилда очилган Юнус Ражабийдан ташқари) зарур ишлар тугалланмаган ҳолда фойдаланишга топширилгани ҳақида хабар берган эди. 2023 йилда метро қатновига бўлган талаб ортиб боришини инобатга олган ҳолда, метрополитен ушбу чиқишларни очиш ташаббуси билан чиққан. Ўзбекистон ҳукумати ишни бажаришга рухсат берган.
Тошкент метрополитени қошидаги «Тошметротранс» лойиҳа институти томонидан барча ёпиқ вестибюлларни ишга тушириш бўйича лойиҳалар ишлаб чиқилиб, давлат экспертизасига топширилган. Сўнг лойиҳалар пудратчини аниқлаш учун тендерга қўйилган. Иш босқичма-босқич амалга оширилиши ва август ойидан бошланиши маълум қилинганди.
