Президенининг Фуқаролик жамиятини давлат томонидан қўллаб-қувватлаш тизимини такомиллаштириш тўғрисидаги фармонида жамоатчилик назорати самарадорлигини ошириш чора-тадбирлари кўзда тутилмоқда.
Ҳужжатга кўра, давлат органлари ҳузуридаги жамоатчилик кенгашлари раислари фуқаролик жамияти институтлари вакиллари орасидан тасдиқланади.
Ҳар йили жамоатчилик кенгашларининг фаолияти самарадорлиги баҳоланади ва унинг натижалари эълон қилинади.
Жамоатчилик кенгашларининг фаол аъзолари давлат органининг бюджетдан ташқари маблағлари ҳисобидан моддий рағбатлантириб борилади.
«Юксалиш» ҳаракати ҳар йили жамоатчилик кенгашлари фаолият самарадорлигини баҳолаб, унинг натижаларини ўз расмий веб сайти ҳамда ижтимоий тармоқларда эълон қилади.
Давлат органлари ҳамда Қорақалпоғистон Вазирлар Кенгаши, вилоятлар ва Тошкент шаҳри ҳокимликларига икки ой муддатда ўзларининг ҳузуридаги жамоатчилик кенгашлари фаолиятини қайта ташкил этиш, шунингдек, «Юксалиш» ҳаракатига унинг сўровига асосан жамоатчилик кенгашлари фаолиятига доир маълумотларни тақдим этиб борилишини таъминлаш топширилди.
Адлия вазирлиги уч ой муддатда «Жамоатчилик назорати тўғрисида»ги қонунни жамоатчилик назорати механизмларини янада кенгайтириш нуқтаи назаридан такомиллаштириш бўйича қонун лойиҳасини Вазирлар Маҳкамасига киритиши керак.
Бунда қуйидагиларни таъминлаш зарур:
- жамоатчилик назоратининг илғор хорижий тажрибага асосланган таъсирчан шакллари;
- жамоатчилик назоратининг ҳар бир шаклини амалга ошириш механизми ва тартиб-таомиллари;
- жамоатчилик назоратининг натижаларига кўра якуний ҳужжатларни расмийлаштириш, жамоатчилик назорати объектига киритиш ва уларни кўриб чиқишнинг аниқ тартиби ва муддатлари;
- давлат органи ҳузуридаги жамоатчилик кенгашлари фаолиятини тартибга солиш.
Фармонда юқоридагилардан ташқари, давлат грантлари ва ижтимоий буюртмалар бўйича лойиҳаларни танлашда шаффофликни ошириш, имтиёзлар бериш ва бошқалар назарда тутилган.
