АҚШ собиқ президенти Дональд Трампнинг 2020 йилги сайлов натижаларини бекор қилишга уриниши бўйича янги айблов хулосаси махсус прокурор Жек Смит томонидан судга юборилди, деб хабар бермоқда The New York Times. Айблов Олий суднинг собиқ президентларда жиноий таъқибдан қисман иммунитет мавжудлиги тўғрисидаги қарорини инобатга олган ҳолда қайта кўриб чиқилди.
Июль ойида АҚШ Олий суди Трампнинг даъвоси бўйича қарор чиқариб, собиқ президентлар лавозимда бўлган вақтида содир этилган расмий ҳаракатлар учун жиноий дахлсизлик ҳуқуқига эга, аммо хусусий тартибда содир этилган ҳаракатлар учун эмас, деб қарор чиқарди.
Мамлакат собиқ раҳбарининг қандай хатти-ҳаракатлари таъқибдан дахлсизлиги ва қайсилари йўқлигини талқин қилиш Олий суд томонидан қуйи инстанция судларига ҳавола этилди.
Янги айблов хулосасида Трампга илгари унга қарши қўйилган қуйидаги айбловлар қўйилган:
- давлатни алдаш мақсадида тил бириктириш;
- расмий тартиб-таомилга тўсқинлик қилиш мақсадида тил бириктириш;
- расмий тартиботларга тўсқинлик қилиш ва тўсқинлик қилишга уриниш;
- фуқароларнинг ҳуқуқларини бузиш мақсадида тил бириктириш.
Бироқ, Трампнинг сайловларни сохталаштириш ҳақидаги ёлғон баёнотларини қўллаб-қувватлаш учун Адлия вазирлигига босим ўтказишга уриниши, шунингдек, сиёсатчининг унинг ёрдамчилари ва адвокати билан суҳбатларига ҳавола қилишга оид эпизодлар ишдан чиқариб ташланди. Шу билан бирга, янги ҳужжатда Трамп ўша пайтдаги вице-президент Майк Пенсга 6 январь куни Капитолийда бўлиб ўтган йиғилишда сайлов натижаларини сертификатлашдан бош тортиши учун босим ўтказганлиги ҳақидаги даъволар сақланиб қолган (ўша куни Трамп тарафдорлари Капитолийни штурм билан олишга ҳаракат қилишганди).
Янги айбловлар оҳанги Трампни «2020 йилда Қўшма Штатлар президентлигига номзод» деб таърифлаган хулосанинг биринчи хатбошисидан кўриниб турибди. Дастлабки версияда у «Қўшма Штатларнинг 45-президенти ва 2020 йилда қайта сайланиш учун номзод» сифатида тилга олинган, деб таъкидлайди нашр. Умуман олганда, янги хулоса 45 саҳифадан 36 саҳифага қисқартирилган.
Трамп ўзининг Truth Social ижтимоий тармоғида янги айблов хулосасини бемаъни, шунингдек, «ўлик» жодугарлар овини қайта тиклаш ва бўлажак сайловларга аралашиш учун уриниш деб атади.
2023 йил августида Дональд Трамп 2021 йил январида Капитолийга бостириб киришда айбланган эди. Айблов томони АҚШнинг собиқ президенти «ҳокимиятда қолишга қатъий қарор қилган» деб ҳисоблаган ва алдаш йўли билан 2020 йилги президентлик сайлови натижаларини бекор қилишга уринган. Трампга нисбатан терговни Гаагадаги Халқаро жиноий судда ишлаган партиясиз махсус прокурор Жек Смит бошқарган.
