Ҳудудлардаги дорихоналарда дорилар нархи асоссиз ошириб сотилгани аниқланди

Ҳудудларда дори воситаларига белгиланган референт нархларни ошириш ҳолатлари аниқланди, дея хабар бермоқда Рақобатни ривожлантириш ва истеъмолчилар ҳуқуқларини ҳимоя қилиш қўмитаси.

Қайд этилишича, республикада фаолият юритаётган дори воситаларини улгуржи ва чакана сотиш фаолияти билан шуғулланувчи хўжалик юритувчи субъектлар томонидан дори воситаларининг нархлари бўйича ўрганишлар олиб борилган. Уларда белгиланган устамаларни ошириб қўлланиш ҳолатларини аниқланган.

Қўмитанинг Fair tech ягона ахборот тизими орқали келиб тушган хабарлар бўйича текшириш ўтказилганда 473 та дорихонада (133 та улгуржи ва 340 та чакана) ҳуқуқбузарлик ҳолатлари юзага келгани маълум бўлган. Хусусан қуйидаги ҳолатларда фуқаролардан дорилар нархларини асоссиз ошириш натижасида маблағлар олинган:

• Тошкент вилоятида 111 та дорихонада 1838 та ҳолатда 39 млн сўм миқдорда;
• Тошкент шаҳрида 71 та дорихонада 17 266 та ҳолатда 1 млрд 911 млн сўм миқдорда;
• Жиззах вилоятида 62 та дорихонада 7005 та ҳолатда 743,7 млн сўм миқдорда;
• Наманган вилоятида 44 та дорихонада 7544 та ҳолатда 1 млрд 14,5 млн сўм миқдорда;
• Навоий вилоятида 32 та дорихонада 1492 та ҳолатда 134,9 млн сўм миқдорда;
• Қорақалпоғистон Республикасида 30 та дорихонада 1391 та ҳолатда 71,8 млн сўм миқдорда;
• Сирдарё вилоятида 24 та дорихонада 1587 та ҳолатда 20 млн сўм миқдорда;
• Фарғона вилоятида 23 та дорихонада 539 та ҳолатда 93,2 млн сўм миқдорда;
• Андижон вилоятида 20 та дорихонада 6352 та ҳолатда 312,8 млн сўм миқдорда;
• Бухоро вилоятида 17 та дорихонада 1866 та ҳолатда 71,8 млн сўм миқдорда;
• Қашқадарё вилоятида 18 та дорихонада 1378 та ҳолатда 18,8 млн сўм миқдорда;
• Самарқанд вилоятида 9 та дорихонада 30 та ҳолатда 36,6 млн сўм миқдорда;
• Сурхондарё вилоятида 7 та дорихонада 1048 та ҳолатда 914 млн сўм миқдорда;
• Хоразм вилоятида 5 та дорихонада 119 та ҳолатда 10 млн сўм миқдорда.

Ўрганишлар натижасида 49 455 та ҳолатда 5,4 млрд сўмга яқин асоссиз даромад олингани аниқланган.

Маблағлар истеъмолчилар фойдасига қайта ҳисоб-китоб қилинган ва уларнинг номуайян доираси ҳуқуқларини тиклаш чоралари кўрилган.