Ўзбекистонда 2025 йил якунигача 1−11-синфларни ўз ичига оладиган ягона таълим тизими учун ўқув дастурлари ва давлат таълим стандарти (ДТС) жамоатчилик муҳокамасига қўйилади. Бу ҳақда 28 август куни Мактабгача ва мактаб таълими вазирлиги ўтказган матбуот анжуманида вазирликнинг Ўқув жараёнини методик жиҳатдан таъминлаш ва дарсликлар бошқармаси бошлиғи Дилшода Норбоева маълум қилди, деб хабар бермоқда «Газета.uz» мухбири.
Масъулнинг тушунтиришича, давлат таълим стандартлари 2017 йилда Вазирлар Маҳкамасининг 187-сонли қарори билан тасдиқланган. Ундан кейин таълим тўғрисидаги қонун қабул қилингач, таълим стандартларини тасдиқлаш ваколати вазирликка берилган. Ҳукуматнинг яна бир тегишли ҳужжатига кўра, мана шу 187-сонли қарор билан тасдиқланган ДТС бекор қилинган ҳамда 2021 йилда вазирликнинг ДТСни тасдиқлаш тўғрисидаги буйруғи қабул қилинган.
Бугунги кундаги барча таълим мазмуни билан боғлиқ бўлган жараёнлар, ўқув дастурлари айнан мана шу амалдаги ДТСдан чиқиб кетмаган ва уни тўлиқ қоплаган ҳолда таълим жараёни ташкил этилган.
«Лекин бугунги кунда вазирлик томонидан РТМ билан биргаликда ДТС ва ўқув дастурларини такомиллаштириш учун мамлакатимиздаги энг етакчи амалиётчи ўқитувчилар, олимлардан иборат бўлган ишчи гуруҳ шакллантирилмоқда. Бу жараёнга халқаро ташкилотлар, консалтинг хизматларни кўрсатиш учун халқаро экспертлар ҳам жалб этилган, яъни таълим дастурларини такомиллаштириш учун. Сентябрь ойидан бошлаб жараёнда ишчи гуруҳ ўз ишини бошлайди. Келгуси йил якунига қадар жараён якунланади», — деди Дилшода Норбоева.
Унинг қўшимча қилишича, вазирлик томонидан dts.uz платформаси ишлаб чиқиляпти. Унга ягона мактаб таълим тизими учун 1−11-синфларни ўз ичига оладиган ўқув дастурлари, ундан аввал эса ДТС жамоатчилик муҳокамасига қўйилади.
«Келишиш ва тасдиқланган вариант ҳам кенг жамоатчилик учун очиқ ҳолатда бўлади. Бугунги кунда платформанинг якуний ишлари олиб бориляпти», — дея таъкидлади вазирлик вакили.
