Париж Паралипиадасининг 2-кунида Ўзбекистон терма жамоаси аъзоси Асила Мирзаёрова пара енгил атлетика бўйича олтин медални қўлга киритди.
Т11 классида узунликка сакраш дастурида иштирок этган спортчи 5,24 метр қайд этиб, энг юқори натижани кўрсатди. Ушбу кўрсаткич янги Паралимпия ўйинлари рекорди сифатида белгиланди. Бундан аввалги рекордни ҳам 5,22 метрга сакраб ўзи янгилаганди.
Хитойлик Гуохуа Чжоу 4,91 метр натижа билан кумуш, испаниялик Алба Гарция Фалаган 4,76 метр натижа билан бронза медалига сазовор бўлди.
Бу Ўзбекистон учун ушбу Паралимпия ўйинларидаги илк олтин медал ҳисобланади. Икки кумуш ва битта бронза медали билан жамоа ҳозирча 6-ўринни эгаллаб турибди.
Маълумот учун, Асила Мирзаёрова 1999 йил 3 июлда туғилган. 2017 йилдан буён пара енгил атлетика бўйича Ўзбекистон терма жамоаси аъзоси ҳисобланади. Икки карра Жаҳон чемпиони, Ханчжоу-2022 Пара Осиё ўйинларида олтин ҳамда Токио-2020 ёзги Паралимпия ўйинларида кумуш медални қўлга киритган. 2023 йил Парижда бўлиб ўтган Жаҳон чемпионатида узунликка сакраш бўйича Париж-2024 ёзги Паралимпия ўйинлари лицензиясини қўлга киритган.
Токио-2021 Паралимпия ўйинлари
2021 йилда Токиода бўлиб ўтган Паралимпия ўйинларида Асила Мирзаёрова узунликка сакрашда 4,89 метр натижа билан кумуш медални қўлга киритганди. Унинг ўйини параатлетика бўйича миллий терма жамоа бош мураббийи Сардор Абдухолиқовнинг ҳаракатлари билан ҳам ёдда қолганди.
Мураббий ҳиссиёт билан Асила Мирзаёровага яқинлашиб, қум майдонига деярли қадам қўйган ва сакраш қоидабузарликсиз якунланганига ишонч ҳосил қилиш учун ҳакамларга қараб бирдан орқага қайтган. Талабларга кўра, спортчиларнинг ўзлари қумли майдонни тарк этишлари керак.
Anatomicá журналига берган интервьюсида спортчи 15 ёшгача мутлақ кўриш қобилиятига эга бўлгани ҳақида гапирган.
«Мен мусиқа мактабида фортепиано бўйича ўқиганман. Бошимдан жароҳат олганимдан кейин кўришдан тўхтадим. Ота-онам мени спортга берди. Жисмоний хусусиятларимга кўра, мен узунликка сакраш каби спорт турига мос келмасдим, мураббий шундай деган. Аммо менинг қатъиятим унинг фикрини ўзгартиришга мажбур қилди. Мен сабрли бўлишни биламан. Айни дамда асосий мақсадим — олтин медални қўлга киритиш ва Ўзбекистон байроғини шоҳсупада кўтариш…Мен оддий бахтни — кўп фарзандли она бўлишни хоҳлайман. Ҳаётдаги ҳеч қандай қийинчиликдан қўрқмайман, уларнинг ҳаммасига бардош бера оламан», — деган у.
