Шавкат Мирзиёев Парижда ўтаётган Паралимпия ўйинларида терма жамоанинг илк олтин медалларини қўлга киритган енгил атлетикачилар Асила Мирзаёрова ва Қудратиллохон Маъруфхўжаев билан телефон орқали мулоқот қилди. Президент матбуот хизмати суҳбат акс этган видеолавҳани эълон қилди.
«Ваъдангизга вафодор бўлиб, қилган ҳамма ҳаракатларингиз терма жамоамизга биринчи олтин медални олиб келгани билан чин қалбимдан ўзимнинг номимдан, халқимнинг номидан табриклайман. Бу машаққатли меҳнатингиз, қизим, Жаҳон чемпионатида тилла олганингизда менда жуда катта ишонч пайдо бўлган эди ва бу умидларимни оқлаганингиз учун катта раҳмат», — давлат раҳбари Асила Мирзаёрова билан суҳбатда.
«Бутун халқимизнинг кайфиятини, жонажон ватанимиз, миллат обрўсини, ватан ғурурини кўтариб чиққанингиз биз учун катта ютуқ. Севимли қизларим нимага қодир эканини дунёга намойиш этдингиз», — деб таъкидлади президент.
Шавкат Мирзиёев шундан сўнг спортчининг Парижга бирга борган отаси Убайдулла ака билан ҳам суҳбатлашди ва миннатдорлик билдирди.
Президент, шунингдек, Қудратиллохон Маъруфхўжаев билан гаплашаркан, унга «ярим тунда олтин медаль олиб келгани учун» раҳмат айтди.
«Тунислик тажрибали рақибинг (Бен Мослаҳ Аҳмед — таҳр.) билан жуда муросасиз кечган баҳсда иродали ғалаба қозонганинг, энг охирги уринишингдан кейин олтин медални нақд қилди деб, халқимизга қувонч, бахт келтирганинг учун сендан миннатдорман», — деди у.
Маъруфхўжаев бунга жавобан президент Олимпиада ғолиблари билан телефон орқали гаплашганида уларга ҳавас қилгани ва ўзи ҳам ғолиб бўлишни дилига тугиб қўйганини айтди.
Президент ҳар икки спортчига ва мамлакат жамоасига омад тилади.
