Ўзбекистон терма жамоаси вакили Гулжаной Наимова Паралимпия ўйинларида таэквондо бўйича кумуш медални қўлга киритди.
К44 классида (бир қўли ампутация қилинган ёки қўл функциясини йўқотган спортчиларни ўз ичига олади) 65 кг дан юқори вазн тоифасида амалдаги, 2020 йилги Паралимпия чемпиони аввалига грециялик Элени Папастаматопулуни (12:5), сўнгра бразилиялик Дебора Менезесни (9:3) мағлубиятга учратди.
Финалда 23 ёшли ўзбекистонлик 35 ёшли Европа чемпиони, Токио-2020 бронза медали совриндори британиялик Эми Трусдейл билан тўқнаш келди. Наимованинг мураббийлар штаби унга ҳимоя капаси тақишни унутиб қўйди, шу боис унга жанг бошланишидан олдин жарима балли белгиланди.
Британиялик қарши ҳужумларни муваффақиятли ўтказди ва финалнинг кульминацион нуқтасига қадар 8 очко жамғаришга муваффақ бўлди — ўйин тугашига деярли бир дақиқа қолганида у Гулжана Наимованинг юзига зарба берди, бу паратаэквондо қоидаларида тақиқланган.
Шифокорлар уни бир неча дақиқа текширувдан ўтказди ва шундан сўнг Гулжаной Наимова жангни давом эттирмаслиги маълум бўлди. Шу билан бирга, мутахассислардан бири бу спортчининг қарори эканини айтди ва қўлларини кўтарди. Параатлетка замбилда олиб кетилди.
Зарба такрорини кўргандан сўнг, ҳакам британиялик зарбани беихтиёр берган, деб ҳисоблади, шунинг учун у дисквалификация эмас, балки фақат огоҳлантириш олди. Якуний ҳисоб — 8:2 Буюк Британия вакили фойдасига.
Кейинроқ Ўзбекистон Миллий Паралимпия қўмитаси раис Мухторжон Тошхўжаев ва Наимова иштирокидаги видеони эълон қилди. Параатлетка жағини ушлаб, у билан ҳаммаси яхши эканини айтди, лекин якунда эришилмаган олтин медаль туфайли кўз ёшларини тия олмади.
Бу Наимованинг фаолиятидаги иккинчи Паралимпия медали, шунингдек, Ўзбекистон жамғармасидаги ўша вақтдаги 10-медаль бўлди. Миллий терма жамоа хабар эълон қилинган вақтда 5 олтин, 3 кумуш ва 3 бронза медали билан 7-ўринни эгаллаб турибди.
