Ўзбекистон қонунчилигида совет мафкураси, даври ва рамзларини тарғиб қилиш тақиқланиши керак. Бу ҳақда «Миллий тикланиш» партияси етакчиси, Олий Мажлис Қонунчилик палатаси спикери ўринбосари Алишер Қодиров ўзининг Telegram’даги каналида ёзди.
Депутат жиноят ишлари бўйича Самарқанд шаҳри судининг СССРни тиклаш тарафдори бўлган 74 ёшли самарқандлик фуқарони уч йилга озодликдан чеклаш жазосига ҳукм қилиш ҳақидаги қарорини қўллаб-қувватлади. Иш материалларига кўра, у Telegram’да «Ўзбекистон мустақиллиги юзаки экани ва собиқ Совет Иттифоқи расман тарқалмагани» ҳақида материаллар эълон қилган.
«Суд қарорини олқишлайман! Ўзбек халқи СССР бошқаруви томонидан камситилган, таҳқирланган ва ҳанузгача ўша даврнинг оғир жароҳатларини даволамоқда. Миллатлар, қадриятлар ва эътиқодни рад этган совет мафкураси нафақат ўзбек халқи, бутун инсоният бошига бало бўлиб келди ва қолдиқлари ҳозиргача бало бўлмоқда», — деб ёзди у.
«Албатта, тарихимизнинг бу аянчли даври таҳлил ва муҳокама қилиниши керак, лекин уни маъқуллаш ёки тарғиб қилиш нафақат Конституцион тузумга жиноят, балки халқимизга ва қонли тузум қурбонларига айланган аждодларимизга хиёнат сифатида баҳоланиши зарур», — дея хулоса қилди Қодиров.
«Миллий тикланиш» партияси раҳбари бундан аввал СССР рамзлари ҳақида ҳам фикр билдирган эди. 2021 йил май ойида у Тошкентдаги «Ғалаба қўшиқлари» концертида СССР байроғи кўтарилгани ҳақорат ва провокация эканини таъкидлаган.
«Биз санъатга қарши эмасмиз, санъатнинг сиёсатга қурол қилинишига қаршимиз. Тараққийпарвар ўзбек зиёлилари ва оқкўнгил аждодларимизнинг қонига бўялган босқинчи совет давлати байроғининг мамлакатимиз пойтахтининг қоқ марказида баланд кўтарилишини ўзбек халқига нисбатан ҳақорат деб ҳисоблаймиз», — деганди депутат.
2023 йил сентябрь ойида Россия давлат думаси депутати Евгений Фёдоров республикалар Совет Иттифоқидан ноқонуний равишда ажралгани ва шунинг учун Россия ҳудудий манфаатлари бузилгани сабабли улар билан курашишга мажбур бўлишини айтганди. Бу ҳақда Ўзбекистон Олий Мажлиси депутатлари киноя билан шундай деган: «Навбатдаги фантазёр».
Ўтган йил апрель ойида Хитойнинг Франциядаги элчисининг собиқ Совет Иттифоқи давлатларининг суверенитетига шубҳа билан қараган баёноти дипломатик можарога сабаб бўлган эди. Қатор Европа давлатлари бунга муносабат билдирган, Хитой эса СССР таркибидан чиққан барча давлатлар мустақиллигини ҳурмат қилишига ишонтиришга тўғри келганди.
2022 йил октябрь ойида Тожикистон президенти Эмомали Раҳмон МДҲ саммитида Россия президенти Владимир Путинга мурожаат қилиб, унинг мамлакати Россия манфаатларига доимо ҳурмат билан муносабатда бўлгани ҳамда ўзаро ҳурматни хоҳлашини таъкидлаганди. У РФдан Марказий Осиё мамлакатларига собиқ Иттифоқ вақтида бўлганидек муносабат қилмасликни сўраган.
