Россия давлат думаси депутати, «Адолатли Россия — Ҳақиқат учун» фракцияси раҳбари Сергей Миронов Марказий Осиё давлатларидан келган мигрантларга Россия фуқаролигини беришга вақтинчалик мораторий жорий этишни таклиф қилди.
«Бу ташаббус билан „Адолатли Россия — Ҳақиқат учун“ 2022 йилдаёқ чиққан эди, ўшанда биз миграцияда тартибни тиклаш учун якка ўзимиз курашгандик. Бугун, миграция билан боғлиқ кескин муаммолар қонунчиларнинг диққат марказида бўлиб турган вақтда биз бу масалани кўриб чиқишга қайтишимиз керак», — деди у ўзининг Telegram’даги каналида.
Дума фракцияси раҳбари мурожаатида саволлар қолдирди: «Нега жанубдан келган меҳмонларга юз минглаб паспортлар тарқатиш керак? Нима учун этник анклавлар яратиш керак? Нима учун бу янги фуқароларнинг ижтимоий таъминоти учун бюджет миллиардларини сарфлаш керак? Бунинг Россияга қандай фойдаси бор?»
Сергей Мироновнинг сўзларига кўра, «гастербайтерларни оммавий паспортлаш мигрантлар легализациясидан яхши пул ишлаётган коррупционерлар мафияси ва фирибгарлар учунгина фойдали».
«Давлат бу мафияга қарши туриши ва миллий хавфсизлик соҳасида ўз манфаатларини ҳимоя қилиши керак. Жумладан, Марказий Осиё мамлакатлари аҳолисига Россия фуқаролигини беришга мораторий орқали. Ҳеч бўлмаганда 2026 йилгача. Бу вақт ичида эса қонунчиликни тартибга солиш, миграция хизматини ислоҳ қилиш, уни порахўрлардан тозалаш, шунингдек, аввал берилган паспортларнинг қонунийлигини текшириш мумкин», — дея таклиф қилди россиялик депутат.
Эслатиб ўтамиз, жорий йилда Марказий Осиёдан келган муҳожирлар Москва яқинидаги «Крокус»да теракт содир этишда айбланаётгани фонида Россияда уларга қарши чоралар муҳокамаси авж олганди.
Терактдан кўп ўтмай, Сергей Миронов Марказий Осиё давлатлари билан виза режимини жорий этиш зарур, деб ҳисоблаган.
«Умуман олганда, миграция сиёсатини кучайтириш керак. Президент террорнинг дини ҳам, миллати ҳам йўқ, деб тўғри айтди. Аммо бу одамлар қаердан танлангани тасодифий эмас. Кимдир қайиқни тебратишни, юртимизда миллатлараро нафрат ва адоватни келтириб чиқаришни жуда хоҳлади. Бунга йўл қўйиб бўлмайди, — деган у. — Биз ўзимизни, суверенитетимиз ва миллий хавфсизлигимизни ҳимоя қилишимиз керак. Бунга эришиш учун биз нафақат виза режимини, балки патентларни чеклашни ҳам таклиф қиламиз. Қолаверса, МҲО („махсус ҳарбий операция“ — таҳр.) давомида РФ ҳудудига ҳар қандай муҳожирни киритишни тўхтатиш керак, деб ҳисоблайман. Шунингдек, биз бу ерда бўлганларнинг барчасини ва уларнинг қолиш сабабларини текширишимиз керак».
